Almatyda jalǵan túbirtektermen alaıaqtyq jasaǵan kúdikti ustaldy
ALMATY. KAZINFORM – Almatynyń Almaly aýdany polıtsııa qyzmetkerleri alaıaqtyq jasady degen kúdikpen turǵyndy ustady. Ol buǵan deıin de alaıaqtyq derekteri boıynsha qylmystyq jaýapkershilikke tartylǵan.
Aldyn ala málimetter boıynsha, kúdikti shaǵyn azyq-túlik dúkenderiniń ıeleri men satýshylaryn aldap, paıda tapqan. Ol arnaıy qoldanbalardy paıdalanyp, taýar úshin onlaın tólem jasalǵany týraly jalǵan elektrondy chekterdi aldyn ala daıyndap qoıǵan. Dúkende esep aıyrysý kezinde satýshyǵa jalǵan chek kórsetip, aqsha aýdarylǵandaı áser qaldyrǵan, alaıda naqty tólem jasalmaǵan. Osylaısha, taýardy aqysyz alyp otyrǵan.
Atalǵan derek boıynsha qazirgi ýaqytta sotqa deıingi tergep-tekserý júrgizilip, kúdiktiniń qylmystyq áreketteriniń barlyq epızody men jábirlenýshiler anyqtalyp jatyr.
– Kúdikti aldyn ala oılastyrylǵan shema boıynsha áreket etken. Qosymshalar arqyly onlaın tólem jasalǵany týraly jalǵan chekter daıyndap, shaǵyn dúkenderdiń satýshylaryn shatastyrǵan. Kóp jaǵdaıda esep aıyrysý qolma-qol aqshasyz júrgiziletindikten, adamdardyń muqııat teksermeıtinine sengen. Qazirgi ýaqytta barlyq qajetti tergeý amaly júrgizilip, jábirlenýshilerdiń tolyq tizimi anyqtalyp jatyr, - dedi Almaly aýdandyq polıtsııa basqarmasynyń bastyǵy Maqsat Pshan.
Polıtsııa kásipkerler men saýda salasy qyzmetkerlerin saq bolýǵa úndedi. Tólem qabyldaý kezinde tek satyp alýshy kórsetken skrınshottar men elektrondy chekterge senbeı, qarajattyń naqty shotqa nemese bank qosymshasyna túskenin mindetti túrde teksergen jón.
Eske salaıyq, buǵan deıin Almatyda sheteldik alaıaqtardyń call-ortalyǵy anyqtalǵanyn habarlaǵanbyz.