Almatyda jalǵan shot arqyly 680 mln teńge salyqtan jaltarǵandar sottaldy
ALMATY. KAZINFORM – Almatyda jalǵan shot-faktýralaryn paıdalaný shemasy arqyly salyq tóleminen jaltarýǵa baılanysty qylmystyq isti tergep-tekserý aıaqtaldy.
Almaty qalasy prokýratýrasynyń málimetinshe, zańsyz áreketterdiń nátıjesinde memleketke 686 mıllıon teńge kóleminde shyǵyn keltirilgen. Bir top adamdar taýarlardy, jumystar men qyzmetterdi is júzinde tıep jibermeı, jalǵan shot-faktýralardy jazyp berý jóninde qylmystyq shemany uıymdastyrǵany anyqtaldy.
- Quqyqqa qarsy is-árekettiń izderin jasyrý jáne salyqtyq baqylaýdy aınalyp ótý maqsatynda jalǵan biriktirý júrgizilgen, keıinnen qujattar rásimdelgen seriktestik, formaldy túrde taratylǵan. Qadaǵalaý qyzmeti aıasynda qala prokýratýrasy narazylyq bildirip, nátıjesinde zańsyz biriktirý toqtatyldy, - dep habarlady prokýratýradan.
Sot qylmystyq toptyń 6 qatysýshysyn QR Qylmystyq kodeksiniń 216 (shot-faktýralardy jalǵan jazý) jáne 262-baptarynda (uıymdasqan qylmystyq topty qurý jáne ony basqarý) kózdelgen qylmystyq quqyq buzýshylyqtardy jasaǵany úshin kináli dep taýyp, árqaısysynyń kinásiniń aýyrlyǵyna baılanysty 6 jyldan 8 jylǵa deıingi merzimge bas bostandyǵynan aıyrý túrindegi jaza taǵaıyndady.
Eske salaıyq, buǵan deıin Almatyda polıtsııa alaıaqtardy SIM-kartalarmen qamtamasyz etken topty ustady.
