Almatyda jalǵan memlekettik tirkeý nómirlerin satqan kúdikti qolǵa tústi
ASTANA. KAZINFORM — Qazaqstan boıynsha jalǵan memlekettik tirkeý nómirlerin satqan zańsyz shemanyń uıymdastyrýshysy ustaldy.
Bas kólik prokýratýrasynyń úılestirýimen Kóliktegi polıtsııa departamentiniń qyzmetkerleri jalǵan memlekettik tirkeý nómirlik belgilerin zańsyz daıyndaý jáne taratý shemasynyń jolyn kesti.
— Almatyda júıeli túrde jalǵan memlekettik nómirlerdi daıyndaýmen jáne satýmen aınalysqan zańsyz árekettiń uıymdastyrýshysy ustaldy. Tergeý málimetteri boıynsha, jalǵan nómirler Reseı Federatsııasynan ekspress-jetkizý qyzmeti arqyly jetkizilip, keıin Qazaqstannyń túrli óńirlerindegi tapsyrys berýshilerge jiberilip otyrǵan, — delingen habarlamada.
Jedel-izdestirý sharalary barysynda jalǵan memlekettik tirkeý nómirlik belgisi jáne basqa da zattaı dáleldemeler tárkilendi. Qylmysqa qatysy bar basqa da tulǵalardy anyqtaý boıynsha ary qaraı tergeý jáne jedel-izdestirý sharalary júrgizilip jatyr.
Bas kólik prokýratýrasy jalǵan memlekettik tirkeý nómirlik belgilerin paıdalaný qylmystyq jaýaptylyqqa ákep soǵatynyn eskertedi. Mundaı quqyq buzý jol qozǵalysy qaýipsizdigine tikeleı qater tóndiredi.
Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.
Aıta ketelik memlekettik tirkeý nómiri joǵalǵan jaǵdaıda — onyń telnusqasyn alǵanǵa deıin kólik quralyn basqarýǵa bolmaıtyny týraly jazǵan edik.
