Almatyda zeınetkerdi aıaldamada sebepsiz uryp-soqqan kúdikti ustaldy

ALMATY. KAZINFORM – Almatynyń Bostandyq aýdanynda belgisiz er adam avtobýs aıaldamasynda 66 jastaǵy áıelge shabýyl jasady.

Oqıǵanyń vıdeosyn áleýmettik jelide zardap shekken áıeldiń qyzy jarııalady. Onyń aıtýynsha, shabýyl «Almaty» shıpajaıy kóshesinde bolǵan.

— Anamyz aıaldamada avtobýs kútip turǵan. Belgisiz jas jigit syrtynan kelip, aınalada eshkim joq sátti paıdalanyp, ony aıaýsyz soqqyǵa jyqqan. Qazir anamyz aýrýhanada jatyr, jaǵdaıy óte aýyr, — dep jazdy ol. 

Qalalyq Polıtsııa departamenti atalǵan derek boıynsha Bostandyq aýdandyq Polıtsııa basqarmasy qylmystyq is qozǵaǵanyn habarlady.

— Qylmys izi sýymaı ashyldy. Jedel-izdestirý sharalarynyń nátıjesinde kúdiktiniń tulǵasy anyqtalyp, ol ustaldy jáne ýaqytsha ustaý ızolıatoryna qamaldy. Qazirgi ýaqytta oqıǵanyń mán-jaıyn jan-jaqty ári obektıvti zertteýge baǵyttalǵan tergeý amaldary júrgizilip jatyr, — dep atap ótti PD baspasóz qyzmetinen.

Polıtsııa ókilderi jazanyń bultartpastyǵy qaǵıdasy ishki ister organdary jumysynyń negizgi ustanymy bolyp qala beretinin atap ótti. Kez kelgen quqyqqa qaıshy áreketterdiń, ásirese zorlyq-zombylyqpen ulasqan qylmystardyń joly kesilip, kináliler zań aıasynda tolyq jaýapqa tartylady.

Eske salaıyq, buǵan deıin Almaty oblysynda áıeli men enesin uryp-soqqan azamat ustaldy.