Almatyda zeınetker pansıonattyń terezesinen qulap ketti
Áleýmettik jelide Almatydaǵy «Zabota» qarttar úıinde zeınetker terezeden qulap, súıegi syndy degen aqparat tarap jatyr. Mekeme qyzmetkerleri jedel járdem shaqyrýdyń ornyna ony uıyqtaýǵa jibergen, dep habarlaıdy QazAqparat tilshisi.
Onyń vıdeosy Telegram arnalarynyń birinde paıda boldy. Oqıǵanyń mán-jaıyn ortalyqtaǵylar QazAqparat tilshisine aıtyp berdi.
«Zabota» qarttar úıiniń kútýshisi Baqdáýlet Toqtaquldyń sózinshe, keleńsiz jaıt 3 qyrkúıek kúni tańǵy tórtter shamasynda bolǵan.
«Bizdiń ortalyqqa 63 jastaǵy er adam 2 qyrkúıek kúni tústi, oqıǵa tańǵy ýaqytta boldy. Naýqasty alyp kelgen týystary onyń sabyrly, agressıvti emes, jaman ádetteri joq ekenin aıtqan bolatyn. Tek kórý qabileti buzylǵanyn eskertti. Er adam ortalyqqa jatqyzyldy. Ol kisini túni boıy baqylaýda ustadyq. Zeınetker dementsııa aýrýyna shaldyqqan eken, ol týraly bizge eshkim eshteńe aıtpady», - deıdi ortalyqtyń kútýshisi Baqdáýlet Toqtaqul.
Onyń aıtýynsha, zardap shekken er adam tańǵy saǵat 4-ter shamasynda óz erkimen bólmesinen shyǵyp, kelesi bólmeniń terezesine shyǵyp, birinshi qabattan sekirip ketken.
«Bizde beınebaqylaý bar. Er adam basqa palataǵa kirgenin kóre salysymen birden sońynan erdik, ony ustaǵymyz keldi, biraq ol qarsylyq tanytyp, syrtqa sekirip úlgerdi. Osydan keıin oǵan ornynan turýǵa kómektesip, palataǵa aparyp, tósekke jatqyzdyq. Naýqas eshnársege shaǵymdanbady, tań atqansha baqylap otyrdyq, biraq tańǵy 8-ge qaraı aıaǵy aýyryp mazalady, men dereý jedel járdem shaqyryp, týystaryna habar berdim. Patsıentpen aýrýhanaǵa birge bardym, túske deıin janynda bolyp, keıin kettim. Týystarymen únemi baılanysta boldym, atanyń jaǵdaıyn dárigerlerden bilip otyrdym. Sondaı-aq, qajetti dári-dármek satyp alyp bergimiz keldi, biraq emdeý mekemesi olarda bári bar ekenin aıtty», - dedi er adam.
Al, naýqastyń týystary polıtsııaǵa aryz jazypty. Almaty polıtsııa departamenti bul fakti boıynsha Bostandyq aýdandyq polıtsııa basqarmasy tergeý júrgizip jatqanyn habarlady.
«Іstiń mán-jaıyn zerdeleý úshin óndiristik materıaldar Almaty qalalyq medıtsınalyq qyzmet kórsetý sapasyn baqylaý departamentine berildi», - dep túsindirdi qalalyq polıtsııa departamentiniń baspasóz qyzmeti.
