Almatyda zeınetker alaıaqtarǵa 30 myń dollar bergen: kúdikti ustaldy
ALMATY. KAZINFORM – Almaty qalasynda ınternet-alaıaqtyqtyń joly kesildi.
Almaty qalasy Polıtsııa departamentiniń málimetinshe, Kıberqylmysqa qarsy kúres basqarmasy zeınetkerlerge baǵyttalǵan iri ınternet-alaıaqtyq shemany áshkereledi.
Ózin memlekettik organdardyń qyzmetkeri retinde tanystyrǵan alaıaqtar «qylmyskerlerden qorǵaý» degen jalǵan jeleýmen egde jastaǵy áıelge qolynda bar qarajatyn «qaýipsizdik úshin» berý kerektigin aıtqan. Zeınetker alaıaqtarǵa 30 myń AQSh dollary men 20 mıllıon teńge kólemindegi qarajatty berip jibergen.
Jedel is-sharalar barysynda halyqaralyq qylmystyq toptyń tapsyrmalaryn oryndap júrgen kýrer ustaldy. Jas jigit Qazaqstanǵa telefon jáne onlaın-alaıaqtyq qurbandarynan alynǵan aqshalaı qarajatty tasymaldaý úshin kelgeni anyqtaldy.
- Alaıaqtar ádeıi osal toptardy tańdap, psıhologııalyq qysym jasaıdy. Operatıvti sharalardyń nátıjesinde qomaqty qarajattyń urlanýyna jol berilmeı, aqshany ıesine qaıtarýǵa múmkindik týdy. Qala turǵyndaryn barynsha saq bolýǵa shaqyramyz: eshbir memlekettik organ aqshany «saqtaýǵa alýdy» talap etpeıdi jáne kýrer jibermeıdi. Mundaı qońyraýlardyń barlyǵy – alaıaqtyq, – dedi Almaty qalasy Kıberqylmysqa qarsy kúres basqarmasy bastyǵynyń orynbasary Erkebulan Qoıshybaev.
Eske salaıyq, buǵan deıin Almatyda ınternet-alaıaqtyqqa paıdalanylǵan arnaıy jabdyq tárkilendi.