Almatyda zańsyz jumys istegen 40-tan astam shetel azamaty ustaldy
ALMATY. KAZINFORM – Almatyda kóshi-qon qyzmetiniń qyzmetkerleri reıdtik sharalar barysynda kóshi-qon zańnamasyn buzý derekterin anyqtady.
Túrksib aýdanyndaǵy qurylys nysandarynyń birinde zańsyz jumys istep júrgen 22 shetel azamaty ustaldy. 9 azamatqa tıisti ruqsatsyz, vızada nemese basqa qujatta kózdelgen maqsatynsyz jumys istegeni úshin ákimshilik materıaldar toltyryldy. Qalǵan 13 adamǵa aldyn alý sharalary qoldanyldy. Olardyń barlyǵy polıtsııanyń qabyldaý-taratý bólimine ornalastyrylǵan.
Odan bólek Alataý aýdanynda zańsyz jumys istep júrgen 9 sheteldik azamat anyqtalsa, Naýryzbaı aýdanynda jeke basyn kýálandyratyn qujaty joq 10 adam ustaldy.
– Biz kóshi-qon zańnamasyn buzý derekterin anyqtaý jáne aldyn alý boıynsha júıeli jumysymyzdy jalǵastyramyz. Qurylys alańdarynda zańsyz jumys istep, tirkeýsiz turyp jatqandarǵa erekshe nazar aýdaramyz. Barlyq anyqtalǵan derek muqııat esepke alynyp, árbir naqty jaǵdaı boıynsha zańǵa sáıkes sharalar qabyldanyp jatyr, - dedi Almatynyń Kóshi-qon qyzmeti basqarmasynyń bastyǵy Erkin Amantaev.
Eske salaıyq, buǵan deıin Almatyda dinı ekstremıstik ádebıetterdi taratqan sheteldik ustalǵanyn jazǵanbyz.