Almatyda zańsyz satylyp jatqan pırotehnıkalyq ónimder tárkilendi
Almatyda zańsyz satylyp jatqan 400 keliden astam pırotehnıkalyq ónim tárkilendi, dep habarlaıdy Kazinform.
Qalalyq Polıtsııa departamentiniń málimetinshe, eki bazarda júrgizilgen tekserý barysynda sertıfıkatsyz, sondaı-aq ruqsat qujattarynsyz pırotehnıkalyq ónimderdi zańsyz satýdyń 9 deregi anyqtaldy.
«QR zańnamasynyń talaptaryn buzǵany úshin zańsyz bólshek saýdany uıymdastyrýshylar QR ÁQBtK-niń 196-baby (Tyıym salynǵan nemese shektelgen taýarlardy nemese basqa zattardy zańsyz saýdalaý) boıynsha ákimshilik jaýapqa tartyldy. 400 keliden astam sertıfıkaty joq pırotehnıkalyq ónim tárkilendi. Bazar ákimshilikterine quqyqbuzýshylyq jasaýǵa yqpal etetin jaǵdaılardyń aldyn alý boıynsha tıisti tapsyrmalar berildi», – deıdi Almaty qalasy PD ÁPB azamattyq jáne qyzmettik qarý aınalymyn baqylaý bóliminiń bastyǵy Aıdos Qusaıynov.
Jańa jyldy toılaý qarsańynda Almaty polıtsııasy, pırotehnıkalyq buıymdardy paıdalaný kezinde qaýipsizdik sharalaryn qatań túrde saqtaýǵa jáne turǵyndardan sertıfıkattalǵan pırotehnıkalyq buıymdardy arnaıy bólingen oryndardan satyp alýǵa keńes berdi.
