Almatyda zańsyz salynyp jatqan 36 turǵyn úı anyqtaldy
Almatyda Bostandyq aýdanynyń turǵyndary Baganashil Hills kottedj qalashyǵynyń zańsyz salýyna narazylyq bildirip, shaǵymyn aıtty, dep habarlaıdy QazAqparat tilshisi.
Almatyda Bostandyq aýdanynyń turǵyndary Baganashil Hills kottedj qalashyǵynyń zańsyz salýyna baılanysty «Qazaqstan halyq partııasy», Almaty qalasy qala qurylysyn baqylaý basqarmasy, BAQ ókilderimen kezdesý ótkizdi. Kezdesý barysynda turǵyndar aýdan aýmaǵynda zańsyz Baganashil Hills kottedj qalashyǵyn salyp jatqan «Everest Property» JShS-nyń ústinen shaǵymdandy.
Gúlnaz esimdi turǵyn Bostandyq aýdanynda ornalasqan «Alataý-2» baý-baqsha seriktestiginde 2001 jyldan beri turyp kele jatqanyn aıtty.
"Biz jaqta salynyp jatqan zańsyz qurylystyń saldarynan keıbir úılerdiń qabyrǵasy jarylyp jatyr. Men sondaı-aq qurylysshy kompanııanyń saıtynan 76 kotedj, 12 taýnhaýs salynatynyn bildim. Qurylys kompanııasy bizge qurylysty talapqa saı júrgizip jatyrmyz deıdi. Alaıda, eshqandaı tynyshtyq talaptary saqtalmaıdy. Kúndiz-túni tars-turs etken dybystar. Tipti úıdiń ishi dirildep ketedi. Biz «Qazaqstan halyq partııasy» ókilderine bul máseleni ádeıi aıttyq. Sebebi olardyń aralasýymen máslıhat depýtattary joǵary jaqqa depýtattyq saýal joldap, máselemizdiń oń sheshimin tabaryna senim artamyz», - dedi ol.
Turǵyndar sondaı-aq «Ermensaı» shaǵyn aýdanynda káriz júıesi, jol, qurylys nysandary, basqa da kommýnaldyq máselerdi baqylaıtyn quramynda qala ákimdigi, máslıhat depýtattary, memlekettik mekemeler, qoǵam ókilderi bar komıssııa qurýdy usyndy.
Almaty qalasy qala qurylysyn baqylaý basqarmasynyń ókili Álibek Tólbasy atalǵan aýmaqqa eki ret tekseris júrgizilgenin aıtty.
«Birinshi tekseris kezinde biz qurylys kompanııasyn ákimshilik jaýapqa tartyp, qurylysty toqtattyq. Keıin maýsym aıynda ekinshi márte tekseris kezinde zańsyz salynyp jatqan 36 turǵyn úıdi anyqtap, «Everest Property» kompanııasynyń ústinen shaǵymdanyp, isti sotqa joldadyq. Sot úılerdi súrý týraly sheshim shyǵardy. Alaıda olar sotqa appelıatsııalyq shaǵym berip úlgerdi. Aıtý kerek, olarda 34 úıdiń eskızdik jobasyna kelisimi bar. ıAǵnı, munda ár úıge menshik ıesi eki qabatqa deıin úı sala alady. Biz ony baqylaı almaımyz. Sebebi ol tekserýge jatpaıdy. QR Sáýlet, qala qurylysy jáne qurylys qyzmeti týraly zańynyń 33-baby, 6-tarmaǵyna sáıkes, tapsyrys berýshi óz betinshe eki qabatty úıdi sala alady. Bul rette ol eskızdik jobany kelisýge quqyly», - dedi Álibek Tólbasy.
«Qazaqstan halyq partııasynyń» Almaty qalalyq fılıaly basshysynyń birinshi orynbasary Beıbit Qusaıynov zańsyz salynyp, buzylmaı jatqan 36 úıge qatysty tıisti mekemelerge depýtattyq saýal joldanǵanyn aıtty.
«Jaraıdy, ruqsaty bar, salynyp jatqan 34 úıde sharýamyz joq. Bizdi zańsyz salynyp, áli súrilmeı jatqan 36 úıdiń máselesi mazalaıdy. Sebebi bul úılerdi buzý týraly sot sheshiminen bólek, Qala qurylysyn baqylaý basqarmasynyń habarlamasy shyqqan. Alaıda ony qulaqqa ilip jatqan eshkim joq. Qurylys toqtamaı júrip jatyr. Osyǵan oraı biz zańsyz salynǵan áli súrilmegen 36 úıge qatysty tıisti mekemelerge depýtattyq saýal joldadyq. Qazir biz jaýap kútip otyrmyz, oń sheshimin tapqansha, bul máseleni nazardan tys qaldyrmaımyz», - dedi Beıbit Qusaıynov.
Eske salsaq, buǵan deıin Baganashil Hills kottedj qalashyǵy buzylýy múmkin ekenin habarlaǵan bolatynbyz.
