Almatyda zańsyz salynǵan úsh qabatty nysan buzylyp jatyr

ALMATY. KAZINFORM — Almatyda sot sheshimimen Medeý aýdanynda zańsyz salynǵan nysandy buzý jumystary bastaldy.

Qala qurylysyn baqylaý basqarmasynan málim etkendeı, jospardan tys tekserý barysynda qurylysqa ruqsat berý qujattarynyń joq ekeni anyqtaldy.

Menshik ıesine jol berilgen buzýshylyqtardy joıýǵa nusqama berlip, ákimshilik shara qabyldandy. Alaıda, jeke tulǵa talaptardy oryndaǵan joq.Sondyqtan basqarma nysandy buzý týraly aryzben aýdandyq sotqa júgindi.

— Medeý aýdandyq sotynyń sheshimimen basqarmanyń talap aryzy qanaǵattandyryldy. Keıin Almaty qalalyq soty da birinshi satydaǵy sheshimdi ózgerissiz qaldyrdy. Nysandy buzý búgin qalanyń Ádilet departamenti qyzmetkerleriniń qatysýymen bastaldy, - dep habarlady ákimdikten.

Eske salaıyq, buǵan deıin Almatyda eki jylda 65 zańsyz nysan, onyń ishinde turǵyn úı keshenderi tolyǵymen nemese ishinara buzylǵany týraly jazǵanbyz.