Almatyda zańsyz salynǵan turǵyn úı kesheni buzylyp jatyr

ALMATY. KAZINFORM — Qala qurylysyn baqylaý basqarmasy «Terekti» shaǵyn aýdanyndaǵy Aınalma kóshesi, 183 ýchaskesinde ornalasqan zańsyz nysandy buzý jumystary bastalǵanyn habarlady. 

Bul turǵyn úı kesheni páter satyp alýǵa usynylmaıtyn turǵyn úıler tiziminde kórsetilgen.

Almaty ákimdiginiń málimetinshe, «Investment Stroy» JShS atalǵan turǵyn úı keshenin ruqsatsyz salǵan. Bul derek jospardan tys tekserý barysynda anyqtaldy.

— Menshik ıesine qatysty ákimshilik sharalar qabyldanyp, keıin Almaty qalasynyń Mamandandyrylǵan aýdanaralyq ekonomıkalyq sotyna (SMES) nysandy buzý jáne shuńqyrdy qaıta kómip tastaý jóninde talap aryz berilgen. 2023 jylǵy 12 shildede sot Qurylys baqylaý basqarmasynyń talaptaryn qanaǵattandyrdy. Apellıatsııalyq shaǵym qaralǵannan keıin Almaty qalalyq soty SMES sheshimin ózgerissiz qaldyrdy. Іs materıaldary oryndaý úshin Ádilet departamentine jiberildi. Nysandy buzý jumystary keshe sot oryndaýshylarynyń qatysýymen bastaldy, — dep habarlady ákimdikten.

Qala qurylysyn baqylaý basqarmasy azamattarǵa jyljymaıtyn múlik satyp almas buryn turǵyn úı keshenine qatysty barlyq qujattardyń bolýyn mindetti túrde tekserýdi usyndy.

Eske salaıyq, buǵan deıin Almatyda sot sheshimimen Ońdasynov kóshesi, 37/12 mekenjaıynda ornalasqan ǵımarat buzylyp jatqanyn jazǵanbyz.