Almatyda zańsyz salynǵan taǵy bir nysan súrildi
ALMATY. KAZINFORM – Túrksib aýdanynda kafeniń janynan salynǵan zańsyz qosalqy nysan buzyldy.
Qala qurylysyn baqylaý basqarmasynyń málimetinshe, jospardan tys tekserý barysynda menshik ıesiniń (jeke tulǵa) tıisti qujattarsyz, Jumabaev kóshesi, 23b mekenjaıynda qosalqy nysandy zańsyz salǵany anyqtalǵan.
- Menshik ıesine qatysty ákimshilik shara qabyldandy, keıin isti qalanyń ákimshilik quqyqbuzýshylyq jónindegi Mamandandyrylǵan aýdanaralyq soty qarady. 2025 jylǵy 27 maýsymda sot menshik ıesin kináli dep taýyp, zańsyz turǵyzylǵan qurylysty buzý jóninde qaýly qabyldady, - dep habarlady basqarmadan.
Qazirgi ýaqytta sot qaýlysyn oryndaý úshin menshik ıesi nysandy ózi buzyp tastaǵan.
Eske salaıyq, buǵan deıin Almatyda zańsyz kólik jýý orny súrildi.
Onyń aldynda Almatynyń taý bókterinde eki zańsyz nysan súrilgenin jazǵanbyz.