Almatyda zańsyz salynǵan taǵy bir nysan buzylyp jatyr

ALMATY. KAZINFORM — Almatyda sot sheshimimen qurylysy aıaqtalmaǵan nysan buzylyp jatyr. 

Almatynyń qala qurylysy baqylaý basqarmasynan málim etkendeı, Gagarın dańǵyly, 284 mekenjaıyndaǵy qurylys nysany zańsyz dep tanyldy.

— Buǵan deıin nysan ıesine (jeke tulǵa) qatysty ákimshilik sharalar qoldanylyp, zań buzýdy joıý týraly nusqama berilgen. Sonymen qatar nysannyń irgetasyna metall qurylymdar ornatý kezeńinde qurylys jumystary toqtatylǵan bolatyn,— dep atap ótti basqarmadan.

Nusqama merzimi aıaqtalǵannan keıin Almaty qalasynyń mamandandyrylǵan aýdanaralyq ekonomıkalyq sotyna nysandy buzý týraly talap aryz berildi. Sot atalǵan talapty qanaǵattandyrdy.

Nysandy buzý Ádilet departamentiniń sot oryndaýshylarynyń qatysýymen bastaldy.

Osyǵan deıin Almatyda memlekettik qordyń jerinde zańsyz ornatylǵan statsıonarlyq emes saýda nysandaryn bólshekteý jumystary júrip jatqany týraly jazǵan edik. 

Almatyda sońǵy eki jylda 65 zańsyz nysan, onyń ishinde turǵyn úı keshenderi tolyǵymen nemese ishinara buzyldy.