Almatyda zańsyz salynǵan taǵy bir ǵımarat buzyldy
ALMATY. KAZINFORM — Almatyda Qaırat shaǵynaýdany Dáýletkereı kóshesi, 61-úı mekenjaıynda iri kúrdeli qurylys buzyldy. Menshik ıesi nysandy ruqsatsyz salǵan.
Almatynyń qala qurylysyn baqylaý basqarmasynyń málimetinshe, jospardan tys tekserý nátıjesi boıynsha basqarma menshik ıesine qatysty qurylys-montaj jumysyn toqtata turýǵa jáne ýchaskeni bastapqy qalpyna keltirýge nusqama bergen.
Alaıda, menshik ıesi talapty oryndamady, osyǵan baılanysty is sotqa joldandy.
«2024 jyly 27 naýryz kúni Túrksib aýdandyq sotynyń sheshimimen basqarmanyń talaby qanaǵattandyryldy. Sot sheshimin oryndaý úshin menshik ıesi nysandy óz erkimen buzdy», — dep habarlady basqarmadan.
Aıta keteıik, byltyrdan beri qala boıynsha 35 zańsyz nysan buzyldy.
Onyń ishinde bıznes ortalyqtar, meıramhanalar, qosalqy ǵımarattar men avtoservıster, sondaı-aq «Mechta» jáne KHAN sııaqty iri turǵyn úı keshenderi bar.
