Almatyda zańsyz salynǵan iri qoıma buzylyp jatyr
ALMATY. KAZINFORM – Almatyda sot sheshimimen iri qurylys nysanyn buzý jumystary bastaldy. Óńirdegi qala qurylysyn baqylaý basqarmasy málim etkendeı, Samǵaý shaǵyn aýdanyndaǵy Kókoraı kóshesi, 28/2 mekenjaıynda ornalasqan 2 000 sharshy metrden astam zańsyz qoıma ǵımarattary tolyq súriledi.
Buǵan deıin basqarma tarapynan «Rıftam» JShS-ne jospardan tys tekseris júrgizilip, nysannyń basym bóligine ruqsat qujattarynyń joq ekeni anyqtalǵan.
Basqarma Almaty qalasynyń mamandandyrylǵan aýdanaralyq ekonomıkalyq sotyna 2174 sharshy metr zańsyz salynǵan nysandy súrýge talap aryz bergen. 2023 jyldyń 8 jeltoqsanynda sot talapty qanaǵattandyrdy, al bıyl 4 naýryzda Almaty qalalyq sotynyń qaýlysymen sheshim ózgerissiz qaldyryldy.
Ádilet departamentiniń sot oryndaýshylarynyń qatysýymen buzý jumystary bastaldy.
Osyǵan deıin Almatyda 1350 sharshy metrden astam salynyp jatqan ǵımarattyń buzylǵany týraly jazǵan edik.
Jalpy, qalady byltyrdan beri 48 zańsyz nysan tolyǵymen jáne jartylaı buzyldy. Onyń ishinde bıznes ortalyq, meıramhana, qosalqy qurylys pen avtoservıs, sondaı-aq Mechta jáne KHAN sııaqty iri turǵyn úı keshenderi bar.
