Almatyda zańsyz salynǵan kópqabatty úı buzylyp jatyr

ALMATY. KAZINFORM – Almatyda sot sheshimimen iri qurylys nysanyn buzý jumystary bastaldy.

Óńirdegi qala qurylysyn baqylaý basqarmasy málim etkendeı, Chernovıtskaıa kóshesi,10 mekenjaıynda ornalasqan úsh qabatty úıdi buzý jumystary bastaldy.

– Menshik ıesi (jeke tulǵa) qurylysqa ruqsat qujattarynsyz kirisken – sáýlet-josparlaý tapsyrmasy (SJT), eskızdik joba kelisimi, joba saraptamasy jáne qurylys-montaj jumystarynyń bastalǵany týraly habarlama bolmaǵan.Turǵynnyń ótinishi boıynsha jospardan tys tekseris nátıjesinde menshik ıesine qatysty ákimshilik shara qabyldandy, - dep habarlady basqarmadan.

Keıin Almaty qalasynyń Jetisý aýdandyq soty basqarmanyń talap-aryzy negizinde zańsyz salynǵan úsh qabatty turǵyn úıdi buzý týraly sheshim shyǵardy. Nysan menshik ıesiniń erikti túrde, sot oryndaýshylarynyń qatysýymen buzylyp jatyr.

Osyǵan deıin Almatyda 1 350 sharshy metrden astam salynyp jatqan ǵımarattyń buzylǵany týraly jazǵan edik. 

Byltyr Almatynyń taý bókterinde zańsyz salynǵan 28 nysan buzyldy. 

Jalpy, qalada 2023 jyldan beri 63 zańsyz nysan tolyǵymen jáne jartylaı buzyldy. Onyń ishinde bıznes ortalyq, meıramhana, qosalqy qurylys pen avtoservıs, sondaı-aq Mechta jáne KHAN sııaqty iri turǵyn úı keshenderi bar.