Almatyda zańsyz salynǵan kezekti nysan buzyldy
ALMATY. KAZINFORM – Almatydaǵy meıramhanalardyń birinde jazǵy terrasa sot sheshimimen buzyldy.
Almaty ákimdiginiń málimetinshe, Medeý aýdanynda ruqsatsyz salynǵan nysan týraly belgili bolǵan. Qajymuqan kóshesi, 37 mekenjaıynda ornalasqan qurylysqa jospardan tys tekserý júrgizilip, zań buzýshylyqtar anyqtalǵan.
Keıin nysan ıesine qatysty ákimshilik sharalar qoldanylyp, materıaldar sot qaraýyna joldandy.
– 2025 jyly 12 tamyzda Almaty qalasynyń Mamandandyrylǵan aýdanaralyq ekonomıkalyq soty zańsyz jazǵy alańdy buzý týraly talap-aryzdy tolyq qanaǵattandyrdy. Sot sheshimin oryndaý maqsatynda nysandy buzý jumystary menshik ıesi tarapynan júzege asyryldy, - dep habarlady ákimdikten.
Eske salaıyq, buǵan deıin Almatynyń taý bókterinde zańsyz salynǵan úsh qabatty nysan buzylyp jatqanyn jazǵanbyz.
Jalpy 2025 jyly Almatyda sot sheshimimen zańsyz salynǵan 42 nysan buzyldy.