Almatyda zańsyz salynǵan elıtalyq klýb úıi buzylady

ALMATY. KAZINFORM – Almatyda elıtalyq Pine Hill klýb úıiniń úshinshi qabaty sot sheshimi boıynsha buzylady.

Qala qurylysyn baqylaý basqarmasy Ermensaı shaǵyn aýdany 7 burysh, 8/1 ýchaskedegi turǵyn úı kesheniniń úshinshi qabatyn buzý jumystary bastalatynyn málimdedi.

«Tapsyrys berýshi (jeke tulǵa) eki qabatty úıdiń qurylysyna ruqsat qujattaryn alǵan, biraq ol qosymsha taǵy bir qabat turǵyzǵan, bul jospardan tys tekserý barysynda anyqtaldy», - dep habarlady basqarmadan.

Sonyń nátıjesinde menshik ıesine qatysty QR ÁQBtK 316-baby 1, 462-baby 3 boıynsha ákimshilik shara qabyldandy.

Basqarmanyń talap-aryzy boıynsha sot talqylaýlarynyń qorytyndysyna sáıkes, 2022 jyly 15 maýsymda Almaty qalalyq soty 3-qabatty buzý týraly sheshim shyǵardy. Nysandy buzý búgin Ádilet departamenti sot oryndaýshylarynyń qatysýymen bastaldy. Tómengi qabattarǵa zaqym keltirmeý úshin qolmen buzylady.

«Jer ýchaskeleriniń menshik ıeleri men qurylys kompanııalaryn QR Sáýlet jáne qala qurylysy qyzmeti týraly Zańnyń jáne qurylys salýdy uıymdastyrý erejeleriniń buzylýyna jol bermeýge jáne qurylysty tek zańdy negizde bastaýǵa shaqyramyz. Olaı bolmaǵan jaǵdaıda sot satysynda isterdi qaraýmen jáne keıinnen buzýdyń joǵary yqtımaldyǵymen zańnama aıasynda jaýapkershilik qaýip tóndiredi», - dep atap ótti basqarmadan.

Esterińizge sala keteıik, buǵan deıin Almaty ákimi Erbolat Dosaev zańsyz qurylysty baqylaýdy kúsheıtýdi tapsyrǵan bolatyn.

Jalpy, qalada byltyrdan beri 34 zańsyz nysan tolyǵymen jáne jartylaı buzyldy, onyń ishinde bıznes-ortalyqtar, meıramhanalar, qosalqy ǵımarattar men avtoservıster, sondaı-aq «Mechta» jáne KHAN sııaqty iri turǵyn úı keshenderi bar.