Almatyda zańsyz salynǵan dámhana men saýda alańdary buzyldy
ALMATY. KAZINFORM – Almatyda sot sheshimimen Vılıams kóshesi, 73 mekenjaıynda ornalasqan iri qurylys buzyldy.
Qala qurylysyn baqylaý basqarmasy málim etkendeı, buǵan deıin menshik ıesine jobalaý-smetalyq qujattamanyń jáne saraptama qorytyndysynyń, avtorlyq jáne tehnıkalyq qadaǵalaýlardyń bolmaýyna baılanysty ákimshilik shara qabyldaǵan.
Tekserý barysynda menshik ıesi ekonomıkalyq ádispen dámhana men saýda alańdaryn salǵany anyqtaldy.
«Menshik ıesi jiberilgen buzýshylyqtardy joıýǵa berilgen nusqamany oryndamady jáne basqarma Almaty qalasynyń mamandandyrylǵan aýdanaralyq ekonomıkalyq sotyna buzýǵa talap aryz túsirdi.Osy jyldyń 7 naýryzynda sottyń sheshimimen basqarmanyń talap-aryzy qanaǵattandyryldy. Menshik ıesi nysandy sot oryndaýshylarynyń qatysýymen buzdy», - dep habarlady basqarmadan.
Esterińizge sala keteıik, Almaty ákimi Erbolat Dosaevtyń zańsyz qurylysqa baqylaýdy kúsheıtý jónindegi tapsyrmasy aıasynda ótken jyldyń basynan beri 45 zańsyz nysan, onyń ishinde «Mechta», KHAN, «Alma Garden» turǵyn úı keshenderi buzyldy.
