Almatyda zańsyz salynǵan dámhana buzylyp jatyr
ALMATY. KAZINFORM — Rozybakıev kóshesi, 166 mekenjaıynda ornalasqan dámhananyń zańsyz salynǵan jazǵy terrasasy buzylyp jatyr. Bul týraly Qala qurylysyn baqylaý basqarmasynyń ókilderi habarlady.
Basqarma taratqan málimetke sáıkes, jospardan tys tekserý barysynda mamandar turǵyn emes ǵımarattyń qasbet jaǵynan ruqsatsyz salynǵan qosalqy qurylystardy anyqtaǵan.
Sonymen qatar, nysandar paıdalanýǵa berý aktisiz qoldanylǵan.
— Tekserý nátıjeleri boıynsha akt shyǵarylǵannan keıin menshik ıesi zańsyz nysandy erikti túrde buzýdy bastaǵan, — delingen habarlamada.
Qazirgi tańda qosalqy qurylystardyń biri tolyq buzyldy, al menshik ıesi ekinshisin buzýǵa kiristi.
Eske salaıyq, buǵan deıin Almatyda taý bókterinde zańsyz salynǵan úsh qabatty nysan buzylyp jatqanyn jazǵanbyz.
