Almatyda zańsyz salynǵan «Bereke» bazary buzyldy
ALMATY. KAZINFORM – Gogol kóshesi, 173 mekenjaıynda ornalasqan zańsyz «Bereke» bazary buzyldy. Bul týraly Almatynyń qalalyq josparlaý jáne ýrbanıstıka baqylaý basqarmasy habarlady.
Vedomstvonyń málimetinshe, menshik ıesi bazardyń saýda oryndaryn ruqsatsyz salǵan.
– Jospardan tys tekserý barysynda menshik ıesine qatysty ákimshilik sharalar qoldanylyp, anyqtalǵan zań buzýshylyqtardy joıý týraly nusqama berilgen. Nusqama talaptary oryndalmaǵandyqtan, basqarma zańsyz salynǵan nysandy buzý týraly talap-aryzdy mamandandyrylǵan aýdanaralyq ekonomıkalyq sotqa joldady, - delingen habarlamada.
Sot ózdigimen salynǵan saýda oryndaryn buzý týraly sheshim qabyldap, keıin bul sheshim oryndaý úshin Ádilet departamentine jiberildi.
Menshik ıesi birinshi satyly sot sheshimin oryndaý maqsatynda nysandy óz erkimen buzdy.
Eske salaıyq, buǵan deıin Almatyda Dıvaev kóshesi, 21/1 mekenjaıynda ornalasqan dúken buzylǵanyn habarlaǵanbyz.
