Almatyda zańsyz oıyn bıznesin uıymdastyrǵan áıel Ázerbaıjanda ustaldy

ASTANA. KAZINFORM – Bas prokýratýra men Qarjy monıtorıngi agenttiginiń qyzmetkerleri QR Ázerbaıjandaǵy Elshiliginiń kómegimen zańsyz oıyn bıznesin uıymdastyrǵan áıeldi qylmystyq jaýaptylyqqa tartý maqsatynda elge ekstradıtsııalady.

Qazaqstandyq áıel 2023 jyly Almaty qalasynda adamdar tobynyń aldyn ala sóz baılasýymen zańsyz oıyn bıznesin uıymdastyryp, asa iri kólemde paıda tapty degen kúdikke ilingen.

- Qylmys jasaǵannan keıin kúdikti jasyrynyp, oǵan halyqaralyq izdeý jarııalandy.

Aǵymdaǵy jyldyń qańtarynda ol Baký qalasynda ustalyp, Qazaqstan Respýblıkasy Bas prokýratýrasynyń suraýy boıynsha otanyna ekstradıtsııalandy, - dep jazdy QMA baspasóz qyzmetinen.

Qazirgi ýaqytta kúdikti Almaty qalasynyń tergeý ızolıatoryna qamaldy.

Aıyptalǵan qylmysty jasaǵany úshin múlki tárkilenip, tórt jyldan jeti jylǵa deıingi merzimge bas bostandyǵynan aıyrý jazasy qarastyrylǵan.

Buǵan deıin qumar oıynǵa áýestengen jeti áskerı qyzmetker jumystan qýylǵan.