Almatyda zańsyz kýrer bolyp júrgen bir top sheteldik eline qaıtarylady

ALMATY. KAZINFORM — Qalalyq kóshi-qon qyzmeti megapolıste zańsyz jumys istegen sheteldikterdi anyqtady. Atap aıtqanda, kórshi memleketterdiń azamattary kýrerlik qyzmet kórsetken.

— Almaty qalasy Bostandyq aýdanynda kóshi-qon zańnamasyn óreskel buzyp, elimizde júrgen jeti sheteldik ustaldy. Onyń ústine olardyń jeke basyn kýálandyratyn qujaty bolmaǵandyqtan qabyldap-taratý ornyna jiberildi. Sot sheshimimen ákimshilik jaýapkershilikke tartylyp, týǵan eline jer aýdarylady. Almaty — Qazaqstannyń iri shahary, qarjy jáne mádenı ortalyǵy retinde shetel azamattaryn da ózine tartady. Degenmen, elge kelý jáne osynda júrip-turý talaptaryn qatań saqtaı otyryp, Qazaqstan zańnamasyn qurmetteý shartymen zańdy túrde bolýy tıis, — dedi Almaty qalasy PD Kóshi-qon qyzmeti basqarmasynyń basshysy, polıtsııa polkovnıgi Ashat Býtýnchınov.

Eske salaıyq, maýsym aıynda kýrerlik qyzmetpen zańsyz aınalysqan 9 sheteldik ustalǵan bolatyn. 

Al osy aıdyń basynda esirtki taratýmen aınalysqan 2 úndistandyq ustaldy.