Almatyda zańsyz qoqys oryndary úshin ákimniń orynbasarlary jazalandy

ALMATY. KAZINFORM – Almaty qalasynyń tabıǵat qorǵaý prokýratýrasynyń ókilderi monıtorıng barysynda qala aýmaǵynda 30-dan astam ruqsat etilmegen qoqys úıindilerin anyqtady.

Prokýratýranyń málimetinshe, qaldyqtardy basqarý boıynsha ekologııalyq talaptardy buzǵany úshin Ákimshilik quqyq buzýshylyq týraly kodeksiniń 344-baby 3 jáne 5-bólikteri boıynsha Medeý jáne Túrksib aýdandary ákimderiniń orynbasarlary, sondaı-aq Alataý aýdany ákimi apparatynyń basshysy ákimshilik jaýapkershilikke tartyldy.

- «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» zań talaptaryna sáıkes aýdan ákimderine abattandyrý jumystaryn uıymdastyrý mindeti júktelgen. Qabyldanǵan sharalar arqyly ákimdikter, anyqtalǵan qoqys tastaıtyn jerlerdi joıý jumystaryn júrgizdi. Qalada ekologııalyq tártiptiń saqtalýyn baqylaý jalǵasady, - dep habarlady prokýratýradan.

Eske salaıyq, buǵan deıin Almaty ákiminiń orynbasaryna aıyppul salynǵanyn jazǵanbyz.