Zańger ári bloger Ádilethan Moldahan ustaldy

ALMATY. KAZINFORM – Almatyda 1 mıllıonǵa jýyq oqyrmandary bar bloger ustaldy.

Bul týraly málimet áleýmettik jelide tarady. Almaty qalasynyń Polıtsııa departamenti atalǵan jaǵdaıdy rastap, túsinikteme berdi.

- Azamat M.-ǵa qatysty kórineý jalǵan aqparat taratý deregi boıynsha sotqa deıingi tergep-tekserýdi tirkedi. Kúdikti ýaqytsha ustaý ızolıatoryna qamaldy. Tergep-tekserý amaldary jalǵasyp jatyr, - dep habarlady departamentten.

Ádilethan Moldahan áleýmettik jelide quqyqtyq saladaǵy beınejazbalarymen tanymal. Ásirese, onyń Ál-Farabı dańǵylynda bolǵan jol apaty jaıly jarııalaǵan beınejazbalary jelide keńinen tarady.

Eske salaıyq, 21 naýryzǵa qaraǵan túni Zeekr kóliginiń júrgizýshisi Ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.

Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy. Bul bap boıynsha 10 jylǵa deıin bas bostandyǵynan aıyrý jazasy qarastyrylǵan.

Іshki ister mınıstri Erjan Sadenov Almatydaǵy jol apatynan keıin birqatar basshy qyzmetinen bosatylǵanyn málimdedi.