Almatyda velojolaqtardyń uzyndyǵy 10 shaqyrymǵa uzarady
ALMATY. KAZINFORM — Almatyda 8 qala kóshesi men Tuńǵysh Prezıdent saıabaǵyn keshendi kórkeıtý jumystary jalǵasyp keledi.
Almaty ákimdiginiń málimetinshe, jobalar Sátbaev, Rozybakıev, Jarokov, Tımırıazev, Jandosov, Masanchı kóshelerinde, sondaı-aq Seıfýllın jáne Abaı dańǵyldarynda júzege asyrylyp jatyr. Aýmaqtardyń jalpy uzyndyǵy shamamen 34 shaqyrym. Joba aıasynda 4 357 aǵash jáne 795 myńǵa jýyq buta otyrǵyzý josparlanǵan.
— Kórkeıtý jumystary aýmaqtardy qasbetten qasbetke deıin jańartýdy qamtıdy. Atap aıtqanda, trotýarlar men júrginshi aımaǵyn salý, kógaldandyrý, avtomatty sýarý júıesin ornatý, syrtqy jaryqtandyrý men ınjenerlik jelilerdi jańǵyrtý, shaǵyn sáýlet nysandaryn ornalastyrý, sondaı-aq balalar jáne sport alańyn salý kózdelgen, — dep habarlady ákimdikten.
Jobalar aıaqtalǵannan keıin osy ýchaskelerdegi velojolaqtardyń uzyndyǵy 10 shaqyrymnan astamǵa artyp, 7,21 shaqyrymnan 17,77 shaqyrymǵa deıin ulǵaıady.
Odan bólek kóriktendirý boıynsha iri jobalardyń biri — Tuńǵysh Prezıdent saıabaǵyna qatysty. Munda keshendi kógaldandyrý, aǵash, buta men gúl daqyldaryn qosa alǵanda, 1 mıllıonǵa jýyq jasyl jelek otyrǵyzý, sondaı-aq úsh sý qoımasy bar avtomatty sýarý júıesin qurý josparlanǵan.
Eske salaıyq, buǵan deıin Almatynyń Naýryzbaı batyr kóshesinde avtobýs jolaǵynyń ornyna velojolaq salynatynyn jazǵanbyz.
