Almatyda «vafeldi» jol tańbasyn kesip ótken júrgizýshilerge aıyppul salyna ma
ALMATY. KAZINFORM — Almatyda júrgizýshilerge jaqyn ýaqytta «vafeldi» jol tańba erejesin buzǵany úshin aıyppul salyna bastaıdy. Qazir polıtseıler tek profılaktıkalyq jáne túsindirý jumystaryn júrgizip jatyr.
Alǵashqy «vafeldi» tańba Almatyda 2019 jyly paıda bolǵan edi. Sol kezde tájirıbe retinde eki qıylysta salynǵan. Keıin bul bastama toqtaǵanymen, 2025 jyly joba qaıta jandandy. Qazir mundaı jol tańbasy qalanyń 10 kóshe qıylysynda bar.
Almaty polıtsııa departamentiniń málimetinshe, 2019 jyly jol qozǵalysy erejelerinde mundaı tańbaǵa qatysty naqty norma bolmaǵan. Al búginde ol resmı túrde bekitilip, «vafeldi» tańbamen belgilengen, biraq bos emes qıylystarǵa shyǵý quqyqbuzýshylyq bolyp esepteledi.
— Qazir jol qozǵalysyn avtomattandyrylǵan baqylaý júıelerimen ıntegratsııa júrgizilip jatyr. Bul aldaǵy ýaqytta osyndaı quqyq buzýdy tirkep, tıisti shara qoldanýǵa múmkindik beredi. Ázirshe bul jumys túsindirý jáne aldyn alý baǵytynda atqarylyp jatyr. Bizdiń maqsat — júrgizýshilerdi tártipke baýlý, ásirese «vafeldi» tańba qoıylǵan jerlerde qıylysty bógemeýge daǵdylandyrý. Munyń bári jol qozǵalysynyń qaýipsizdigin arttyrý úshin jasalyp jatyr, — dedi Almaty polıtsııa departamentiniń resmı ókili Saltanat Ázirbek.
Eske salaıyq, buǵan deıin Almaty kóshelerinde kólik keptelisin azaıtý maqsatynda «vafeldi» jol tańbalary paıda bolǵanyn habarlaǵanbyz.