Almatyda úı janýarlaryn qaraýsyz qaldyrýǵa tyıym salynady
ALMATY. KAZINFORM — Almatyda máslıhattyń kezekten tys XXIX sessııasy barysynda depýtattar úı janýarlaryn kútip-baǵý men serýendeýge shyǵarýdyń jańa úlgilik qaǵıdalaryn bekitti.
Bul qujatty jergilikti normalardy Qazaqstan zańnamasynyń sońǵy ózgeristerine sáıkes keltirý úshin qalanyń Kásipkerlik jáne ınvestıtsııalar basqarmasy ázirledi.
Jańa erejeler turǵyndardyń qaýipsizdigine, qalanyń tazalyǵyna jáne úı janýarlarynyń ıeleriniń quqyqtaryn saqtaýǵa baǵyttalǵan.
Endi kóshedegi úı janýarlarynyń minez-qulqy úshin jaýapkershilik kúsheıe túsedi: mysaly, úı janýarlaryn qaraýsyz qaldyrýǵa tyıym salynady. Eger úı janýarlarynyń ıesi oǵan kútim jasaı almasa, ýaqytsha baspana taýyp, qamqorlyqty úshinshi tulǵaǵa berýge nemese ony haıýanattar baǵyna ornalastyrýǵa mindetti.
Itterge erekshe nazar aýdarylady: olardy óz betinshe serýendeýge jáne aınalasyndaǵylarǵa qaýip tóndirmeıtin jaǵdaılarda ustaý kerek. eger ıtti serýendetetin jerde qorshaý bolmasa, ıtterdi qarǵybaýmen ustaý qajet. Al arnaıy baqylaýdy qajet etetin ıtteri bar ýchaskelerdiń qaqpasynda eskertý belgisi ilinýi tıis.
— Itterdi serýendetýge keletin bolsaq, qoǵamdyq oryndarda úı janýarlary qarǵybaýynyń uzyndyǵy eki metrden aspaýy kerek. Al kópshilikte, tasymaldaý kezinde jáne jergilikti atqarýshy organdar, uıymdar, mekemeler belgilegen arnaıy aımaqtarda ıtke tumyldyryq kıgizilýi tıis.
— «Jattyǵý alańy» jáne «Erkin serýendeý» sııaqty jańa uǵymdar da Almatynyń barlyq turǵyny úshin mindetti erejelerge endi, — delingen habarlamada.
Osyǵan deıin Almatyda úı janýarlaryn tegin zararsyzdandyrý baǵdarlamasy bastalǵany týraly jazǵanbyz.