Almatyda úı kezeginde turǵan 124 adamǵa páter kilti tabystaldy
ALMATY. KAZINFORM – Qalanyń kommýnaldyq turǵyn úı qorynan turǵyn úı kezeginde turǵan halyqtyń áleýmettik osal toptaryna 124 páter bólindi.
Naýryzbaı aýdanynyń ákimi Názıra Toǵyzbaevanyń aıtýynsha, 2024 jyly kezekte turǵan jetim balalardyń 16%-y úshin turǵyn úı máselesi sheshiledi.
Almaty ákimdigi halyqtyń áleýmettik osal tobyna jatatyn adamdardy, atap aıtqanda, jetim balalardy turǵyn úımen qamtamasyz etý máselesine erekshe nazar aýdarady. 2022 jyly Almaty qalasynyń kommýnaldyq turǵyn úı qorynan jetim balalarǵa 14 páter tabystalsa, 2023 jyly 55 páter berildi.
«2024 jyly HÁOT sanaty úshin 2 myń jalǵa beriletin páter berý josparlanyp otyr, onyń 400-i jetim bala. Bul Almaty qalasynyń ákimi Erbolat Dosaevtyń jeke bastamasy, muqtajdar úshin jalǵa beriletin páterlerdiń 20%-y jetim balalarǵa bólinedi. Búgin biz Shuǵyla shaǵyn aýdanyndaǵy Alem City-2 turǵyn úı kesheninde ornalasqan úsh úıdegi HÁOT sanatyna jatatyn 124 kezekte turǵandarǵa páter kiltin tapsyrdyq. 124 páterdiń 49-y bir bólmeli, 75-i eki bólmeli», - dedi Almaty qalasy Kommýnaldyq ınfraqurylymdy damytý basqarmasy basshysynyń orynbasary Ǵalymjan Ábdishúkiruly.
Onyń aıtýynsha, jańa páter ıeleri aı saıyn baspanany jaldaý aqysyn óteýi kerek. Naýryzbaı aýdanynda bir bólmeli páterdi jalǵa alý quny 10 myń teńge, eki bólmeli páter 15 myńǵa jýyq, úsh bólmeli páter shamamen 20 myń teńge.
Sondaı-aq, kommýnaldyq qyzmetti ýaqytyly tóleý qajet. Baǵdarlamanyń sharty boıynsha azamattarǵa páterdi jalǵa berýge nemese qaıta josparlaýǵa tyıym salynady.
Páter alǵandardyń biri - turǵyn úıge birneshe jyl kezekte turǵan zeınetker Úmit Qurmanálıeva.
«Qala ákimi Erbolat Dosaevqa zor alǵysymdy bildirgim keledi. Bul kún men úshin naǵyz mereke. Uzaq jyl boıy kezekte turdym, biraq eshqashan úmitimdi úzbedim», - dedi ol.
