Almatyda ústine aǵash qulaǵan qyz mert boldy – ákimdik málimdeme jasady
ALMATY. KAZINFORM – 13 tamyz kúni Almatyda ústine aǵash butaǵy qulaǵan qyz kóz jumdy.
Qaıǵyly oqıǵa Almaly aýdany Ádı Sháripov kóshesi men Qarasaı batyr kóshesiniń qıylysynda bolǵan.
Qala ákimdiginiń málimetinshe, oqıǵa ornyna Almaly aýdany ákiminiń apparaty, Almaly aýdany prokýratýrasy, Ekologııa jáne qorshaǵan orta basqarmasy, sondaı-aq atalǵan basqarmaǵa qarasty «Eco Almaty» JShS ókilderi kelgen.
– Tekserý barysynda butaǵy synǵan aǵashtyń jasyl tústi jáne qanaǵattanarlyq jaǵdaıda ekeni anyqtaldy. Tek syrtqy kórinisine qarap butaqtardyń nemese aǵashtyń qulaýy múmkin ekenin anyqtaý múmkin emes. Óıtkeni ol jasyl tústi jáne qýraý belgileri joq, - dep málimdedi ákimdikten.
Qala basshylyǵy osy mańda 2024 jyly turǵyndardyń ótinishi boıynsha emen aǵashy, 2025 jyly turǵyndardyń ótinishi boıynsha Sháripov jáne Bógenbaı batyr kósheleriniń qıylysyndaǵy terek sanıtarlyq túrde kesilgenin atap ótti.
– Alaıda atalǵan aǵash boıynsha bıyl ótinishter túspegen jáne ol jasyl tústi, qýraý nemese apatty jaǵdaı belgileri bolmaǵandyqtan, kesýge negiz bolmaǵan. Jalpy 2025 jyldyń basynan beri Almaly aýdany aýmaǵynda turǵyndardyń ótinishteri men júrgizilgen tekserýler nátıjeleri boıynsha 21 myńnan astam aǵashqa sanıtarlyq kesý júrgizildi, - delingen ákimdik jaýabynda.
Eske salaıyq, bıyl sáýir aıyndaǵy daýyl kezinde Almatyda 28 aǵash qulap, 3 shatyr ushqanyn jazǵanbyz.