Almatyda ústine aǵash qulaǵan 19 jastaǵy qyz qaıtys boldy
ALMATY. KAZINFORM – Almatyda Baým toǵaıynda ústine qýraǵan aǵash qulap, aýyr jaraqat alǵan 19 jastaǵy qyz kóz jumdy.
№4 qalalyq klınıkalyq aýrýhananyń dárigerleri onyń ómiri úshin eki apta boıy kúresti, alaıda naýqasty qutqaryp qala almady.
Aýrýhananyń baspasóz qyzmeti jábirlenýshiniń 27 maýsymda aýrýhanaǵa óte aýyr jaǵdaıda túskenin habarlady. Jaǵdaıynyń aýyrlyǵyna baılanysty ol anestezıologııa, reanımatsııa jáne qarqyndy terapııa bólimderinde emdeldi.
Dárigerler onyń ómirin saqtap qalý úshin barlyq múmkin sharalardy qoldanyp, táýlik boıy baqylaýda boldy.
– Dıagnostıkalyq jáne emdeý sharalarynyń tolyq keshenine qaramastan, naýqastyń júregi 14-shi kúni toqtap qaldy. Reanımatsııalyq sharalarǵa qaramastan, bıologııalyq ólim tirkeldi, - dep túsinikteme berdi aýrýhana.
Aýrýhana ujymy marqumnyń otbasy men dostaryna kóńil aıtty.
Oqıǵa 27 maýsymda saǵat 15:00 shamasynda bolǵan edi. Qyz otbasymen birge Baým toǵaıy arqyly serýendep júrgende, kenetten úlken qýraǵan aǵash onyń ústine qulaǵan. Sodan qyz aýyr jaraqat aldy. Bas súıegi janshylyp, san súıegi synǵan, aıaqtyń ashyq synyǵy jáne basqa da kóptegen jaraqat aldy.
Almaty ákimdigi buǵan deıin oqıǵa boıynsha sotqa deıingi tergeý bastalǵanyn, onyń barysynda oqıǵaǵa quqyqtyq baǵa beriletinin habarlaǵan bolatyn. Qala ákimshiligi sonymen qatar Baým toǵaıynda aǵashtardyń qulaý qaýpi týraly eskertý belgileri ornatylǵanyn atap ótti.
