Almatyda ústel tennısinen jasóspirimder arasyndaǵy halyqaralyq týrnır ótedi
ASTANA. KAZINFORM — Dúbirli dodaǵa 17 el men aýmaqtan 230 jas sportshy qatysady, dep habarlaıdy Almaty qalasy ákimdiginiń baspasóz qyzmeti.
Almatyda 24-27 shilde aralyǵynda Týrızm jáne sport mınıstrligi men qala ákimdiginiń qoldaýymen WTT Youth Contender Almaty halyqaralyq týrnıri ótedi. Týrnırde qazaqstandyq sportshylarmen qatar Aýstralııa, Ázerbaıjan, Gonkong, Izraıl, Úndistan, Indonezııa, Irak, Iran, Qatar, Qytaılyq Taıbeı, Koreıa Respýblıkasy, Malaızııa, Mońǵolııa, Túrikmenstan, Ózbekstan jáne Japonııanyń ókilderi baq synaıdy.
Qazaqstan quramasynyń sapynda ártúrli jas sanattarynda óner kórsetetin 82 tennısshi el namysyn qorǵaıdy.
Týrnır Halyqaralyq ústel tennısi federatsııasy (ITTF) men World Table Tennis (WTT) uıymdarynyń qoldaýymen uıymdastyrylady.
Jarys halyqaralyq jasóspirimder serııasynyń kúntizbesine engizilgen. Sondyqtan qatysýshylardyń kórsetken nátıjesi álemdik reıtıngti qalyptastyrý kezinde eskeriledi.
Sportshylar 11 jáne 13 jasqa deıingi uldar men qyzdar, 15, 17 jáne 19 jasqa deıingi jasóspirim uldar men qyzdar arasyndaǵy jekeleı synda, sondaı-aq 15 jáne 19 jasqa deıingi aralas juptar arasyndaǵy saıystarda júldelerdi sarapqa salady.
Jarys ADD Ustel Tennis Ortalygy sport kesheninde (Nurkent shaǵynaýdany, 14B) ótedi. Kórermender úshin kirý tegin. Baıraqty básekeni SportPlus Qazaqstan telearnasy tikeleı efırde kórsetedi.
Budan buryn álemniń úzdik tennısshileri 2027 jyly Astanada bas qosatynyn jazǵan edik.
