Almatyda úshinshi qabattan sekirip ketken sarbazdyń jaǵdaıy belgili boldy
ALMATY. KAZINFORM — Almatyda kópqabatty úıdiń úshinshi qabatynan sekirip ketken sarbazdyń jaǵdaıy týraly jańa málimet belgili boldy.
Almaty qoǵamdyq densaýlyq saqtaý basqarmasynyń habarlaýynsha, 2007 jyly týǵan sarbaz qazir qalalyq kópsalaly jedel shuǵyl kómek kórsetý aýrýhanasynda em qabyldap jatyr.
Jaǵdaıy — ortasha aýyr.
— Naýqas beıindi bólimshege jatqyzyldy. Oǵan aýrýhana psıhologi keńes berip, psıhoemotsııalyq qoldaý tolyǵymen kórsetilip jatyr. Negizgi aýrýy boıynsha em QR Densaýlyq saqtaý mınıstrliginiń hattamasyna saı júrgizilip jatyr, — delingen basqarma taratqan aqparatta.
Eske salaıyq, 2025 jylǵy 4 qazanda Almatydaǵy 5571 áskerı bóliminde merzimdi qyzmettegi sarbaz úshinshi qabattan sekirip ketken edi. Ol Almaty shuǵyl medıtsınalyq járdem aýrýhanasyna jetkizildi.
Qazir qyzmettik tekseris taǵaıyndalyp, mán-jaı anyqtalyp jatyr.