Almatyda úsh jylda tasymaldaýshylarǵa 2,3 mlrd teńge kóleminde negizsiz sýbsıdııalar tólengen
ALMATY. KAZINFORM – Almatyda bıýdjet qarajaty men aktıvterdiń paıdalanylý tıimdiligine júrgizilgen memlekettik aýdıt nátıjesinde 203 mlrd teńgeden astam qarjylyq buzýshylyq anyqtaldy. Bul týraly QR Joǵary aýdıtorlyq palatasynyń otyrysynda málim boldy.
Aýdıt 1 qańtar men 17 qyrkúıek aralyǵyn qamtydy. Tekserý barysynda josparlaý, basqarý jáne baqylaý júıesinde júıeli kemshilikter bary belgili boldy.
Vedomstvonyń habarlaýynsha, Almaty el halqynyń 11%-dan astamy turatyn jáne JІÓ-niń shamamen 22%-yn qalyptastyratyn iri ekonomıkalyq ortalyq bolǵanymen, qala ekonomıkasy áli de negizinen saýda men qyzmet kórsetý salasyna táýeldi. Óndiristik jáne ınnovatsııalyq sektorlardyń damý qarqyny tómen, bul ósimdi tejeıdi.
Aýdıtorlar qalanyń 2021-2025 jyldarǵa arnalǵan damý jospary jıi túzetilgenimen, tıimdi basqarý quralyna aınalmaǵanyn atap ótti. Josparlanǵan is-sharalardy tolyq qarjylandyrmaý saldarynan birqatar nysanaly ındıkatorlarǵa qol jetkizilmegen.
– Bıýdjettik ınvestıtsııalyq jobalar sanynyń 2022 jylǵy 365-ten 2025 jyly 529-ǵa deıin ósýine qaramastan, olardy iske asyrýda kemshilikter bar. Mysaly, 2021 jyly jasalǵan Jas Qanat shaǵyn aýdanynda 41 kóppáterli úı salý jobasy boıynsha aýdıt kezinde 7 úı qurylysy aıaqtalmaǵan, al taǵy 12-si irgeles aýmaqtyń abattandyrylmaýyna baılanysty kommýnaldyq menshikke berilmegen, - dep habarlady vedomstvo.
Qalalyq mobıldilik basqarmasy 2022-2025 jyldary tasymaldaýshylarǵa 2,3 mlrd teńge kóleminde negizsiz sýbsıdııalar tólegen.
Jer qatynastary basqarmasyna jer bólý kezinde ashyqtyqty arttyrý jáne nysanaly paıdalanýdy baqylaýdy kúsheıtý usynyldy. Qurylys tyǵyzdyǵy talaptarynyń saqtalmaýy ınjenerlik jáne kólik ınfraqurylymyna túsetin júktemeni arttyrǵan.
«Almaty» áleýmettik-kásipkerlik korporatsııasynyń qyzmeti de tıimsiz dep baǵalandy. Turǵyn úı qurylysyna bólingen shamamen 30 mlrd teńge úsh jylǵa jýyq ıgerilmegen. ÁKK azyq-túlik baǵasyn turaqtandyrý mindetin tolyq oryndaı almaǵan. Bıýdjettik kredıtter tıimsiz paıdalanylǵan.
– Jalpy aýdıt qorytyndysy boıynsha 203 mlrd teńgeden astam somaǵa qarjylyq buzýshylyqtar anyqtaldy. Tekserý júrgizý kezinde onyń 26 mlrd teńgeden astamy óteldi, sondaı-aq esepke alý boıynsha jáne jumystardy oryndaý jolymen 83 mlrd teńgeden astamy qalpyna keltirildi. Ákimshilik quqyq buzýshylyq belgileri bar 417 fakt boıynsha materıaldar ákimshilik is júrgizýdi qozǵaý úshin ýákiletti organdarǵa berildi, - delingen QR Joǵary aýdıtorlyq palatasy taratqan habarlamada.
Eske salaıyq, buǵan deıin Almatyda áleýmettik mańyzy bar azyq-túlik taýarlarynyń baǵasyn turaqtandyrý úshin jeńildetilgen nesıege ótinish qabyldaý bastalǵanyn habarlaǵanbyz.