Almatyda úsh kósheni uzartýǵa taǵy 10,5 mlrd teńge jumsalady
ALMATY. KAZINFORM — Almatyda qalalyq máslıhattyń kezekti 51-sessııasy kezinde 2026-2028 jyldarǵa arnalǵan qala bıýdjeti naqtylandy. Almaty ekonomıka jáne qarjy basqarmasynyń basshysy Baýyrjan Qudaıbergenov megapolıstiń iri kóshelerin uzartýǵa qosymsha qarjy bólinetinin aıtty.
Onyń sózinshe, Rysqulov dańǵylyn qala shekarasyna deıin uzartý jumystaryn aıaqtaý úshin 5 mlrd teńge qarastyrylady. Al Raıymbek dańǵylyn Shyǵys aınalma avtomobıl jolyna deıin uzartýǵa taǵy 5 mlrd teńge jumsalmaq. Odan bólek Muqanov kóshesin Gogol kóshesinen Raıymbek dańǵylyna deıin jetkizý úshin 500 mln teńge bıýdjetten baǵyttalady.
Baýyrjan Qudaıbergenov jyl sońyna deıin «Aqjar» jáne «Terekti» shaǵyn aýdandaryndaǵy jol qurylysyn aıaqtaý josparlanǵanyn aıtty. Birinshisine 2,7 mlrd teńge, al ekinshisine 650 mln teńge bólinedi.
Qoǵamdyq kólikti, onyń ishinde avtobýs tasymaldary men metropolıtendi sýbsıdııalaýǵa da qosymsha qarajat qarastyrylǵan. Onyń ishinde avtobýstarǵa 10 mlrd teńge, metropolıtenge 2 mlrd teńge baǵyttalady.
Qala shekarasyndaǵy kóshe keńeıtiledi
Sondaı-aq sessııa barysynda máslıhat depýtattary Qılybaı Medeýbekov (burynǵy Karernaıa) kóshesin rekonstrýktsııalaý jumystaryna baılanysty suraq qoıdy. Olar batys baǵytta qala men oblys shekarasyn bólip jatqan kóshe qalaı túrlenetinin surady. Oǵan Jol ınfraqurylymyn damytý basqarmasynyń basshysy Oljas Shabdanov jaýap berdi.
Onyń sózinshe, Medeýbekov kóshesin Raıymbek dańǵylynynan Abaı dańǵylyna deıin jańǵyrtý jobasy aıasynda ony 4 jolaqqa deıin keńeıtý josparlanǵan. Qamtylatyn jol uzyndyǵy — 3,3 km. Joba aıasynda trotýar, velojol jáne kósheni jaryqtandyrý qarastyrylǵan.
— Qoǵamdyq kólikke arnalǵan arnaıy jolaqty qosý máselesin qosymsha qarastyramyz. Bul kósheni keńeıtý — Abaı dańǵyly men uzartylyp jatqan Tóle bı, Jubanov kóshelerimen baılanys ornatýǵa múmkindik beredi, — dedi ol.
Al Almaty ákimi Medeýbekov kóshesi buryn oblys qaramaǵynda bolǵanyn, biraq qazir qalanyń menshigine ótkenin málimdedi. Sondaı-aq Darhan Satybaldy Abaı, Rysqulov, Saın, Tilendıev kóshelerin Úlken Almaty avtomobıl aınalma jolyna deıin uzartý úshin oblys aýmaǵynda jumystar da qala bıýdjetinen qarjylandyrylatynyn atap ótti.
— Sebebi bul qala úshin kóbirek qajet, — dedi ákim.
Eske salaıyq, buǵan deıin máslıhat otyrysynda Almaty ákimi Barlyq bazaryna deıingi metro jelisiniń qurylysy bastalǵanyn aıtqan edi.
