Almatyda úsh kólik soqtyǵysyp, jolaýshy zardap shekti
ALMATY. KAZINFORM — Almatydaǵy Shyǵys aınalma jolynda úsh kólik soqtyǵysyp, jol-kólik oqıǵasy boldy.
Kýágerlerdiń aıtýynsha, jol apatynan keıin Shyǵys aınalma jolynyń soltústik baǵytynda birneshe shaqyrymǵa sozylǵan keptelis paıda boldy.
Almaty polıtsııa departamenti baspasóz qyzmetiniń málimetinshe, jol apaty 21 qyrkúıekte saǵat 15:10 shamasynda Medeý aýdanynda bolǵan.
Aldyn ala málimet boıynsha, Mercedes kóliginiń júrgizýshisi Shyǵys aınalma joly arqyly Saǵadat Nurmaǵambetov kóshesimen soltústik baǵytta kele jatyp, oń jaqqa qaıta turý kezinde Toyota Highlander kóliginiń búıirinen soqqan.
Toyota Highlander ınertsııamen Nissan Pathfinder kóligine soǵylǵan.
Jol apaty saldarynan Toyota Highlander kóliginiń jolaýshysy aýrýhanaǵa jetkizildi.
— Oqıǵa boıynsha Medeý aýdandyq polıtsııa basqarmasynyń qyzmetkerleri tekseris júrgizip jatyr. Jol apatynyń mán-jaıy anyqtalyp jatyr, — dep habarlady Almaty polıtsııa departamenti.
Eske salaıyq, búgin tańerteń Almatynyń Áýezov aýdanynda jolaýshylar trolleıbýsy órtengeni habarlandy.
