Almatyda úsh qarjy pıramıdasynyń qyzmetine tosqaýyl qoıyldy

ASTANA. KAZINFORM — QMA Almaty qalasy boıynsha departamenti «Warner Bros», «Roborock» jáne «NFT+TRX» qarjylyq pıramıdalarynyń qyzmetin toqtatty.

Qarjylyq pıramıda uıymdastyrýshylary salymshylardy treılerlerdi kórý arqyly joǵary paıda alý degen syltaýmen jobalarǵa ınvestıtsııa salýǵa kóndirgen.

— Joba 9 deńgeıden quralyp, ortasha salym somasy 225 myń teńgeni qurady. Tólemder tek USDT krıptovalıýtasynda qabyldandy. Mysaly, «Warner Bros» jobasy boıynsha salymshylar arnaıy qosymshaǵa tirkelip, krıptovalıýta arqyly qoljetimdilikti satyp alyp, treılerlerdi kórý úshin jáne jańa salymshylardy shaqyrý úshin «esepteletin» syıaqylar alǵan. Tergeý barysynda salymshylardan qarajat jınaý jáne tranzıt jasaý úshin qoldanylǵan krıptovalıýtalyq ámııandar anyqtaldy. Sottyń sanktsııasymen 3,8 mln USDT kóleminde krıptoaktıvterge tyıym salyndy, — delingen QMA taratqan aqparatta.

Osyǵan deıin QMA Qostanaı oblysynda esirtki satýmen aınalysqan iri Telegram-arnany buǵattaǵanyn jazǵan edik.