Almatyda úsh baǵytta metronyń 23 beketi salynady

ALMATY. KAZINFORM — Bul týraly Almaty qalasy ákiminiń orynbasary Almashan Smatlaev aıtty. 

Onyń sózinshe, qoldanystaǵy metro jelisi Abaı dańǵyly boıymen Alataý kóshesi arqyly «Barlyq» stantsııasyna deıin uzartylady — 3 metro beketi bolady (5,3 km). Onyń qurylysy úshin jobalaý-smetalyq qujattama ázirlenip, memlekettik saraptamaǵa jiberilgen.

Odan bólek Almashan Smatlaev metrony «Jibek joly» beketinen Almaty áýejaıyna deıin jetkizý jospary týraly baıandady.

— Bul baǵytta 8 beket pen 14 shaqyrym metro jelisi salynady. Ol Gogol kóshesi arqyly Ortalyq demalys saıabaǵy arqyly ótedi. Ári qaraı Shyǵys avtomobıl aınalma jolyna shyǵyp, áýejaıǵa deıin jetedi. Tehnıkalyq-ekonomıkalyq negizdeme ázirlenip jatyr. Memlekettik saraptamadan 2026 jyldyń qańtar-aqpan aıynda ótedi, — dedi ol.

Sondaı-aq qala ákiminiń orynbasary metro jelisiniń úshinshi baǵytyna toqtaldy. Bul joba boıynsha «Saıran» beketinen Alataý qalasyna deıin 12 beket (21,5 km) salý josparlanǵan. Tehnıkalyq-ekonomıkalyq negizdeme 2026 jyldyń jeltoqsan aıynda daıyn bolady.

Eske salaıyq, buǵan deıin Almaty metropolıteniniń úshinshi jelisi Alataý qalasynan «Mızam» bazary arqyly qazirgi «Saıran» metro beketine deıin salynýy múmkin ekenin jazǵanbyz.