Almatyda urlanǵan telefondardy ótkizetin oryn anyqtaldy

ALMATY. KAZINFORM – Almatyda er adam urlanǵan smartfondar satyp alyp otyrǵan.

Almaty qalasy Polıtsııa departamentiniń málimetinshe, jedel-izdestirý is-sharalary barysynda urlanǵan tehnıkany satyp alyp, saqtaýmen aınalysqan er adamdy ustaldy.

– Jedel is-sharalardy júrgizýge qaladaǵy mekemelerdiń birinde jasalǵan telefon urlyǵyn tergeý sebep boldy. Kúdiktiniń qolynan urlanǵan smartfon, sondaı-aq ártúrli markaly 30 telefon men eki planshet tárkilendi, - dep habarlady departamentten.

Polıtsııa atalǵan derek boıynsha sotqa deıingi tergep-tekserý jumystaryn bastady. Kúdikti ýaqytsha ustaý ızolıatoryna qamalǵan. Sonymen qatar tárkilengen tehnıkanyń zańdy ıelerin anyqtaý, ustalǵan azamattyń ózge de qylmystarǵa qatysy bar-joǵy tekserilip jatyr.

– Urlanǵan múlikti satyp alý — osy qylmys tizbegindegi negizgi býyndardyń biri. Dál osyndaı «deldaldardyń» bolýy urlyq faktileriniń kóbeıýine yqpal etedi. Satyp alýshylardyń zańsyz qyzmetin anyqtaý jáne jolyn kesý jumystary turaqty túrde júrgiziledi. Tárkilengen barlyq mobıldi qurylǵylar tekserilip, olardyń zańdy ıeleri mindetti túrde anyqtalady, — dedi krımınaldyq polıtsııa basqarmasynyń bastyǵy Ashat Daýletııarov.

Eske salaıyq, buǵan deıin Almatyda dúkenge qaraqshylyq shabýyl jasalyp, kúdikti ustaldy.