Almatyda ýrbanıstıka basqarmasynyń burynǵy basshysyna qatysty sot qaıta bastaldy
ALMATY. KAZINFORM – Almatyda qala qurylysyn baqylaý jáne ýrbanıstıka basqarmasynyń burynǵy basshysy Almashan Ahmedjanovqa qatysty qylmystyq is sotta qaıta qaralyp jatyr.
Bul is boıynsha barlyǵy 6 adam aıyptalǵan. 2025 jyldyń aqpanynda Almatynyń mamandandyrylǵan aýdanaralyq soty olardy laýazymdyq ókilettikterin asyra paıdalandy, para aldy jáne alaıaqtyqqa járdemdesti degen aıyptar boıynsha kináli dep tanydy.
2025 jylǵy úkim boıynsha Almashan Ahmedjanov 11 jylǵa, jer qatynastary basqarmasynyń burynǵy basshysy Ardaq Samambetov 10 jylǵa, al jerge ornalastyrý, jer telimderin alyp qoıý jáne rezervke qoıý bóliminiń eks-basshysy Erlan Jarmuhanbetov 14 jylǵa bas bostandyǵynan aıyrylǵan. Sondaı-aq baǵalaý kompanııasynyń dırektory Almazhan Bákirov 8 jylǵa sottalsa, kásipkerler Muqanbetaly Shalqarbekov pen Berik Úskembaevqa 5 jyl shartty jaza taǵaıyndaldy.
Alaıda 2026 jyldyń aqpanynda Almaty qalalyq soty bul úkimniń kúshin joıdy. Naýryz aıynda qylmystyq-protsestik zańnama talaptarynyń buzylýyn joıý úshin is prokýrorǵa qaıtaryldy. Sot qujattaryna súıensek, birinshi satydaǵy sot tergeýdi tolyq júrgizbegen jáne protsestik qatelikterge jol bergen. Atap aıtqanda: 5 epızod boıynsha Ahmedjanov tek mamandardyń qorytyndysy negizinde kináli dep tanylǵan, biraq sol mamandardyń biliktiligi men quzyrettiligi tıisti deńgeıde tekserilmegen.
Odan bólek birneshe epızod boıynsha keltirilgen shyǵyn kólemi jer telimderiniń naryqtyq jáne kadastrlyq quny arasyndaǵy aıyrmashylyqpen eseptelgen. Biraq bul esepteýler de kúmán týdyrǵan.
Sot otyrysy búgin qaıta bastaldy. Іsti Almaty qalasynyń Qylmystyq ister jónindegi mamandandyrylǵan aýdanaralyq sotynda sýdıa Baqythan Bákirbaev qarap jatyr. Sottalýshylar men jábirlenýshi tarap sot zalynda foto jáne vıdeo túsirilim jasaýǵa qarsylyq bildirdi.
Eske salaıyq, 2023 jyly shilde aıynda Sybaılas jemqorlyqqa qarsy qyzmet Almaty qalasy ýrbanıstıka basqarmasynyń burynǵy basshysyn ustaǵany belgili boldy.
