Almatyda ýnıversıtetter arasyndaǵy tuńǵysh FIDE álem chempıonaty ótedi
ASTANA. KAZINFORM – Almatyda 4-9 tamyz aralyǵynda ýnıversıtetter arasyndaǵy tuńǵysh FIDE komandalyq álem chempıonaty ótedi, dep habarlaıdy Qazaqstan shahmat federatsııasy.
Álemdik stýdenttik shahmat dodasynyń fınalyna 16 ýnıversıtet komandasy qatysady. Olardyń qatarynda Oksford, Kembrıdj, Garvard, Saint Louis University, Webster University jáne University of Texas at Dallas sekildi álemniń jetekshi joǵary oqý oryndary bar. Qazaqstan namysyn ál-Farabı atyndaǵy Qazaq ulttyq ýnıversıteti men Qazaq ulttyq sport ýnıversıteti qorǵaıdy.
– FIDE-niń mundaı formattaǵy alǵashqy chempıonatyn ótkizý – biz úshin úlken mártebe ári zor jaýapkershilik. Tańdaýdyń Qazaqstanǵa túsýi elimizdiń álemdik qoǵamdastyqtaǵy joǵary bedeli men seniminiń aıqyn dáleli. Bul týrnır sport sheńberinen shyǵyp, halyqaralyq yntymaqtastyqqa jol ashady. Biz qatysýshylardyń joǵary deńgeıdegi uıymdastyrýdy kórip qana qoımaı, Qazaqstannyń qonaqjaılylyǵyn sezingenin qalaımyz, – dedi Qazaqstan shahmat federatsııasynyń prezıdenti Tımýr Týrlov.
Federatsııa málimetinshe, chempıonat Qazaqstan men Halyqaralyq shahmat federatsııasy (FIDE) arasyndaǵy áriptestiktiń jalǵasy sanalady. 2025 jyldyń qarasha aıynda Memleket basshysy Qasym-Jomart Toqaev FIDE prezıdenti Arkadıı Dvorkovıchpen kezdesip, Qazaqstanda halyqaralyq týrnırler ótkizý jáne birlesken shahmat jobalaryn damytý máselelerin talqylaǵan bolatyn.
Fınaldyq kezeńge segiz komanda onlaın irikteý arqyly joldama alsa, taǵy segiz ujym FIDE men uıymdastyrýshylardyń arnaıy shaqyrýymen qatysady. Komandalar tórt topqa bólinip, úzdik segizdik pleı-off kezeńinde shırek fınal, jartylaı fınal jáne fınalda baq synaıdy.
Ár match tórt taqtada ótedi. Reglament boıynsha ár komanda quramynda keminde bir er jáne bir áıel shahmatshy bolýy tıis. Chempıonattyń jalpy júlde qory – 50 myń eýro.
– Іrikteý kezeńderine 49 elden 79 komanda qatysty. Mundaı aýqym týrnırdiń halyqaralyq mártebesiniń joǵary ekenin kórsetedi jáne Qazaqstannyń álemdik deńgeıdegi ıntellektýaldyq jarystardy ótkize alatyn el retindegi bedelin nyǵaıtady, – dedi Qazaqstan shahmat federatsııasynyń birinshi vıtse-prezıdenti Dármen Sádýaqasov.
Chempıonatpen qatar 4-5 tamyz kúnderi Almatyda Qazaqstannyń 18 jasqa deıingi quramasy Álem quramasyna qarsy halyqaralyq match ótkizedi. Jarysqa 8, 10, 12, 14, 16 jáne 18 jasqa deıingi sanattar boıynsha 24 jas shahmatshy qatysady.
Týrnırdi Halyqaralyq shahmat federatsııasy (FIDE), QR Týrızm jáne sport mınıstrligi, Qazaqstan shahmat federatsııasy, Almaty qalasynyń ákimdigi, Freedom kompanııalar toby jáne Lichess.org uıymdastyrady.
4-9 tamyz aralyǵynda ótetin ýnıversıtetter arasyndaǵy tuńǵysh FIDE komandalyq álem chempıonatynyń resmı ashylý saltanaty 4 tamyz kúni Farabi Hub ortalyǵynda ótedi.
Aıta keteıik, Dınara Sádýaqasova óńirlerdegi jas shahmatshylarǵa shákirtaqy taǵaıyndady.
