Almatyda Uly Jeńistiń 80 jyldyǵyna arnalǵan drondar shoýyn 60 myń adam tamashalady
ALMATY. KAZINFORM – Jeńistiń 80 jyldyǵyn merekeleý aıasynda Abaı alańynda drondar shoýy ótti.
Jeńis kúnine arnalǵan merekelik is-shara qala turǵyndary men qonaqtary úshin tańǵajaıyp kórinis usyndy. Ony 60 myńǵa jýyq almatylyq tamashalady.
Aspanǵa bir mezette 500-den astam dron ushyp, Jeńis elementteri men el tarıhyndaǵy mańyzdy sátterdi beıneleıtin erekshe baǵdarlamany usyndy.
Qazaqstandyq batyrlarǵa erekshe mán berildi. Aty ańyzǵa aınalǵan Mánshúk Mámetova men Álııa Moldaǵulovanyń beıneleri aspanda jańǵyryp, árqaısysy ózine tán bolmysymen kórindi: Mánshúk — avtomatymen, al Álııa — myltyǵymen.
Áýe keńistiginde áıgili ushqysh Talǵat Bıgeldınov te kózge tústi.
Al qolbasshy, jazýshy, Halyq qaharmany Baýyrjan Momyshulynyń beınesi – erlik pen rýhtyń sımvolyna aınaldy.
Budan bólek, Uly Jeńiske 80 jyl, «Eshkim de, eshqashan da umytylmaıdy!» – «Nıkto ne zabyt, nıchto ne zabyto» degen jazý paıda boldy. Shoýdyń sharyqtaý shegi qazaqy oıýmen kómkerilgen merekelik kompozıtsııa jáne jarqyraǵan «Jeńis kúni qutty bolsyn!» degen jazýmen aıaqtaldy.
— Bul zamanaýı vızýaldy shoý — batyrlarǵa taǵzym ǵana emes, soǵys týraly jańa, qoljetimdi, áserli ári este qalarlyq baıandaý túri. Ol tarıhı jadymyzdy saqtaý men keler urpaqqa jetkizýdiń mańyzdylyǵyn eske salady. Іs-shara demeýshilerdiń qoldaýymen barlyq qaýipsizdik talap saqtala otyryp uıymdastyryldy, — dep atap ótti ákimdikten.
Eske salaıyq, osyǵan deıin Almaty aspanynda soǵys batyrlarynyń beınesi kórsetiletini týraly jazǵan edik.
