Almatyda Uly Otan soǵysynyń ardagerin 101 jasymen quttyqtady
ASTANA. KAZINFORM — Almaty qalasynda Uly Otan soǵysynyń ardageri Ivan Begýnovtyń 101 jasqa tolýyna oraı saltanatty quttyqtaý sharasy ótti, dep habarlaıdy Qorǵanys mınıstrliginiń baspasóz qyzmeti.
Ǵasyrdan asqan ǵumyr ıesine qurmet kórsetýge jergilikti áskerı basqarý organdarynyń ókilderi, Qurlyq áskerleri áskerı ınstıtýtynyń jáne Desanttyq-shabýyldaý áskerleriniń áskerı qyzmetshileri, sondaı-aq Qarýly kúshterdiń ardagerleri arnaıy keldi.
Jınalǵandar maıdangerdiń erligine taǵzym etip, onyń Uly Jeńiske qosqan ólsheýsiz úlesi úshin shynaıy alǵys pen zor qurmet bildirdi. Qorǵanys mınıstriniń atynan Ivan Matveevıchke quttyqtaý hat tabystalyp, estelik syılyqtar usynyldy. Ardagerge myqty densaýlyq, uzaq ǵumyr jáne otbasy amandyǵyn tiledi.
— Eń bastysy — elimizde beıbitshilik bolsyn. Ómirdiń qadirin bilip, ár kúndi taza júrekpen qarsy alyńyzdar, — dep aq batasyn berdi qarııa.
Ivan Begýnov 1925 jylǵy 15 sáýirde Jıtomır qalasynda dúnıege kelgen. Taǵdyrdyń talaı synyn erte jastan ótkergen ol toǵyz jasynan bastap kindik sheshesiniń tárbıesinde ósedi. On alty jasynda eńbek izdep Batys Qazaqstanǵa qonys aýdaryp, sol jerde surapyl soǵys bastalady.
Maıdanǵa Aqtóbe oblysynan attanǵan jas jaýynger Ýkraına maıdanyndaǵy 228-gvardııalyq atqyshtar polkinde pýlemetshi bolyp qyzmet atqaryp, Eýropa elderin azat etýge qatysady. Ol Jeńisti Praga qalasynda qarsy aldy.
Erligi men batyldyǵy úshin Ivan Matveevıch Qyzyl Tý ordenimen, «Erligi úshin» medalimen jáne ózge de jaýyngerlik marapattarmen nagradtalǵan.
Soǵystan keıingi jyldary da ol el ıgiligi úshin aıanbaı eńbek etip, qurylys salasynda abyroıly qyzmet atqardy. Qyzylordadaǵy «Qazqurylysmontaj», keıin Almatydaǵy «Qazelektromontaj» mekemelerinde prorab bolyp, el damýyna ózindik úlesin qosty.
Búginde ardager Almaty qalasynda qyzy Irınamen birge turady. Onyń ónegeli ómir jolyn jalǵap kele jatqan úlken áýleti bar. Bes nemere, on bir shóbere jáne bir shópshegi ósip keledi.
Ǵasyr jasaǵan qarııa áli kúnge deıin sergektigin joǵaltpaı, el men álemdegi jańalyqtarǵa qyzyǵýshylyq tanytyp otyrady. Ol — tek óz otbasynyń ǵana emes, tutas ulttyń maqtanyshy, keıingi urpaqqa úlgi bolarlyq asyl tulǵa.
Buǵan deıin Qaraǵandyda áskerıler ardagerdi ǵasyrlyq mereıtoıymen quttyqtaǵanyn jazdyq.