Almatyda soǵys ardageri Ekaterına Baranova 101 jasqa toldy
ASTANA. KAZINFORM — Almatyda Ekinshi dúnıejúzilik soǵys ardageri, maıdanger-medbıke Ekaterına Aleksandrovna Baranova 101 jasqa keldi, dep habarlaıdy qala ákimdiginiń baspasóz qyzmeti.
Ardagerdi týǵan kúnimen quttyqtaýǵa Almaly aýdany ákimdiginiń ókilderi, áskerı bólimniń jeke quramy, Tótenshe jaǵdaılar departamentiniń qyzmetkerleri, sondaı-aq qalalyq jáne aýdandyq ardagerler keńesiniń ókilderi keldi.
Ekaterına Aleksandrovna 1925 jyly 29 maýsymda dúnıege kelgen. 1943 jyldyń mamyrynan 1945 jyldyń jeltoqsanyna deıin 1-Ýkraına maıdanynda qyzmet atqaryp, suryptaý gospıtalinde medbıke bolyp jaralanǵan jaýyngerlerge kómek kórsetti.
Soǵys jyldaryndaǵy erligi men janqııarlyǵy úshin ol II dárejeli «Otan soǵysy» ordenimen jáne birqatar jaýyngerlik medalmen marapattalǵan. Jeńisten keıin Mınıstrler Keńesiniń aýrýhanasynda 39 jyldan astam ýaqyt eńbek etip, bar ǵumyryn medıtsına salasyna arnady.
Kezdesý barysynda qonaqtar Ekaterına Aleksandrovnaǵa Jeńiske qosqan úlesi men kóp jylǵy adal eńbegi úshin alǵys aıtyp, zor densaýlyq, amandyq jáne uzaq ǵumyr tiledi.
Óz kezeginde ardager kórsetilgen qurmet pen ystyq yqylas úshin alǵys bildirip, ómirdegi basty ustanymy adamdarǵa meıirimmen qaraý jáne salaýatty ómir saltyn ustaný ekenin jetkizdi.
Budan buryn soǵys ardageri Táńirbergen Tolǵanbaevqa «Eńbek ardageri» medali tabystalǵanyn jazdyq.
