Almatyda úleskerlerdiń 290 mln teńgesin ıemdengen alaıaq sottaldy

ALMATY. KAZINFORM – Almatyda úleskerlerdiń aqshasyn ıemdengen alaıaq 6 jyl 8 aı merzimge bas bostandyǵynan aıyryldy. 

Naýryzbaı aýdanynyń prokýratýrasy úleskerlerdiń qarajatyn tartý jóninde zańsyz qyzmetke baılanysty alaıaqtyqtyń jolyn kesti. 

«2022 jyly «Flora City Stroy» JShS dırektory «K» azamaty «instagram», «krisha.kz» áleýmettik jelilerinde qurylys salýǵa ruqsat qaǵazynsyz «Lantana» jáne «Flora» TK qurylysynyń bastalýy týraly jarnama bergen. Odan keıin «K» azamaty, satyp alýshylardy aldaý jáne olardyń senimin paıdalaný jolymen aldyn ala satyp alý jáne satý sharttaryn jasap, 290 mln teńge mólsherindegi 34 úleskerdiń aqshasyn ıelengen», - dep habarlady vedomstvodan.

Materıaldar sotqa deıingi tergep-tekserý júrgizý úshin Bostandyq aýdanynyń polıtsııa basqarmasyna joldandy.

«21 maýsym kúni Bostandyq aýdandyq sotynyń úkimimen «K» azamaty QR QK-niń 190-baby 4-bóligi 2-tarmaǵymen (asa iri mólsherdegi alaıaqtyq) kináli dep tanylyp, 6 jyl 8 aı merzimge bas bostandyǵynan aıyryldy. Alynǵan ýchaskeler jábirlenýshilerdiń zalalyn óteý úshin satylatyn bolady», - dedi vedomstvo ókilderi.

Úkim zańdy kúshine engen joq.

Almaty qalasynyń prokýratýrasy azamattardy jyljymaıtyn múlikti satyp alý kezinde qyraǵy bolýǵa jáne ruqsat berý, sondaı-aq quqyq belgileıtin qujattardyń bolýyn tekserýge shaqyrady.