Almatyda ýlanǵan RFMM oqýshylarynyń barlyǵy emhanadan shyǵaryldy
ALMATY. KAZINFORM — Almatyda Respýblıkaldyq fızıka-matematıka mektebiniń (RFMM) oqýshylary úıge shyǵaryldy.
Almaty qalasy Qoǵamdyq densaýlyq saqtaý basqarmasynyń málimetinshe, búginde Balalar qalalyq klınıkalyq juqpaly aýrýlar aýrýhanasyna jatqyzylǵan RFMM oqýshylary emdeý kýrsynan ótkennen keıin úılerine shyǵarylǵan. Jalpy 12 qazannan bastap statsıonarǵa 58 bala jatqyzylǵan.
— Dárigerler olarǵa qajetti medıtsınalyq kómek kórsetip, hattamalarǵa sáıkes emdeý sharalaryn júrgizdi. Qazirgi ýaqytta aýrýhanada jatqan balalardyń barlyǵy emhanadan shyǵaryldy, — dep habarlady basqarmadan.
Eske salaıyq, ótken aptada RFMM 48 oqýshysy jiti ishek ınfektsııasynyń belgilerimen aýrýhanaǵa jatqyzyldy.
Keıin RFMM ákimshiligi oqýshylardyń aýrýhanaǵa túsýine baılanysty túsinik berdi. 14–16 qazan aralyǵynda mektep sabaqtary onlaın formatta ótti.
Sondaı-aq atalǵan derek boıynsha Bostandyq aýdandyq polıtsııa basqarmasy janyndaǵy polıtsııa bóliminde qylmystyq is qozǵaldy.
Al Densaýlyq saqtaý mınıstrligi «Master Food» JShS-niń tamaqtaný blogyn tekserý barysynda azyq-túlik ónimderin saqtaý, daıyn taǵamdardyń táýliktik synamalaryn alý jáne tamaqtanýdy uıymdastyrý talaptarynyń buzylǵany anyqtalǵanyn habarlady.
Keıin aýrýhanaǵa túsken oqýshylardyń sany artqany belgili boldy.
