Almatyda UQShU qorǵanys mınıstrleri birqatar qujatqa qol qoıdy
ALMATY. KAZINFORM — Almatyda UQShU-ǵa múshe elder Qorǵanys mınıstrleri keńesiniń otyrysy ótti. Onyń barysynda áskerlerdi ozyq qarý-jaraqpen jaraqtandyrý jónindegi qujattarǵa qol qoıyldy.
Otyrysqa UQShU-ǵa múshe memleketter qorǵanys vedomstvolarynyń basshylary, uıymnyń bas hatshysy jáne birikken shtab bastyǵy qatysty.
Otyrystyń shaǵyn quramynda UQShU Ujymdyq qaýipsizdik aımaqtaryndaǵy áskerı qaýipsizdikke qatysty syn-tegeýrinder men qaýip-qater týraly uıymnyń bas hatshysy Imanǵalı Tasmaǵambetov baıandama jasady.
Taraptar áskerı qaýipsizdik salasyndaǵy yntymaqtastyqty damytýdyń basym baǵyttary týraly pikir almasyp, óz kózqarasyn bildirdi.
Keńestiń plenarlyq otyrysynda taraptar birqatar qujattar qabyldady.
Olar UQShU-nyń ujymdyq kúshterin birlesip daıarlaýdy josparlaý, zamanaýı qarý-jaraq úlgilerimen, áskerı jáne arnaıy tehnıkamen jabdyqtaý tóńireginde boldy.
Kezdesý sońynda Qazaqstannyń Qorǵanys mınıstri otyrysqa qatysýshylarǵa jemisti jáne nátıjeli jumysy úshin rızashylyǵyn bildirdi.
«Búgingi otyrys barysynda biz Ujymdyq qaýipsizdik týraly shart uıymynyń ujymdyq qaýipsizdik aımaqtaryndaǵy syn-tegeýrinder men qaýip-qaterge jan-jaqty taldaý júrgizdik. Uıymǵa múshe memleketter qorǵanys vedomstvolarynyń ózara is-áreketin odan ári tereńdetýge jáne onyń áskerı quramdas bóligin damytýǵa baǵyttalǵan qujattar qaralyp, qol qoıyldy», — dep túıindedi general-polkovnık Rýslan Jaqsylyqov.
