Almatyda tutynýshylardyń 285 mln teńgesi qaıtaryldy

ALMATY. KAZINFORM – Almatyda Saýda jáne tutynýshylardyń quqyqtaryn qorǵaý departamenti jyl basynan beri 1 858 azamattyq shaǵymdy qarady. Bul týraly óńirlik kommýnıkatsııalar qyzmetiniń baspasóz máslıhatynda departament basshysynyń orynbasary Nurlan Ábdıev málimdedi.

Spıkerdiń sózinshe, almatylyq tutynýshylarǵa 284 892 085 teńge qaıtaryldy. Jospardan tys 15 tekserý júrgizilip, 55 ákimshilik aıyppul salyndy.

– Taýardy aıyrbastap bermeý men qaıtarýdan bas tartý, sondaı-aq 10 kúndik merzimde shaǵymǵa jaýap berilmeýi boıynsha kóptegen shaǵym tústi. Sonymen qatar, áleýmettik mańyzy bar ónimderge ústeme baǵany zańsyz qosý derekteri jıi anyqtalǵan, – deıdi Nurlan Ábdıev.

Shaǵymdardyń basym bóligi bólshek saýda men elektrondy saýda salalarynan. 

Turmystyq qyzmet kórsetý salasynda da tutynýshylar sapasyz qyzmetke jıi tap bolady. Mundaı jaǵdaıda departament túsindirý jumystaryn júrgizip, sotqa deıin shaǵym jazýǵa kómektesedi jáne sot protsesterine úshinshi tulǵa retinde qatysady.

Spıker sondaı-aq 2025 jyldyń 13 naýryzynan bastap Qazaqstan Respýblıkasynyń Ákimshilik quqyqbuzýshylyqtar týraly kodeksine ózgerister engizilgenin eske aldy. 

– Bul ózgerister departamenttiń ókilettigin keńeıtti. Qazir memlekettik organ atalǵan kodekstiń 157, 190 jáne 193-baptary boıynsha ákimshilik isterdi qarap jatyr. 190-baptyń 5-bóligine sáıkes, tutynýshylardyń quqyqtary týraly aqparattyń bolmaýy, shaǵymdarǵa kesh jaýap berilýi jáne aqshanyń ýaqtyly qaıtarylmaýy sııaqty zańbuzýshylyqtar úshin salynatyn aıyppul mólsheri: shaǵyn bızneske – 10 AEK, orta bızneske – 15 AEK, iri bızneske – 25 AEK,– dedi ol.

Buǵan deıin 151 kásipker tutynýshylardyń quqyǵyn buzǵany úshin jaýapqa tartylǵany týraly jazǵanbyz.

Aıta keteıik, jaqynda Senat qarjy qyzmetterin tutynýshylardyń quqyqtaryn kúsheıtýge baǵyttalǵan zań jobasyna birqatar túzetý engizip, ony Májiliske qaıtardy.