Almatyda turmysy tómen otbasylardyń úıine ýly gazdy anyqtaıtyn datchık ornatyldy
ALMATY. KAZINFORM — Almatyda sońǵy 6 jylda az qamtylǵan otbasylarǵa tegin 1500-ge jýyq gaz ıisin anyqtaıtyn qurylǵy ornatyldy. Bul týraly qalalyq Tótenshe jaǵdaılar departamentiniń basshysy Nurlan Atyǵaev aıtty.
Almatyda jeke turǵyn úılerde órt qaýipsizdigin qamtamasyz etý boıynsha «Órtsiz ómir — qaýipsiz bolashaq» aýqymdy profılaktıkalyq aktsııasy ótti. Kópbalaly otbasy, zeınetkerler men múmkindigi shekteýli azamattardy qosa alǵanda, halyqtyń áleýmettik osal sanattaryna erekshe nazar aýdaryldy.
Shara barysynda TJD mamandary kómir jáne otynmen jylytylatyn 16 muqtaj otbasynyń úıine gaz ıisin anyqtaý datchıkteri ornatyp berdi.
«2018 jyldan bastap Almatyda az qamtylǵan otbasylar úshin óteýsiz negizde 1500-ge jýyq gaz ıisin anyqtaıtyn datchıgi ornatyldy. Alaıda, keıbir turǵyn olardy óshirip tastaıdy, bul úlken qaýip tóndiredi. Biz túsindirý jumystaryn jalǵastyryp, barlyǵyn órt qaýipsizdigi erejelerin saqtaýǵa shaqyramyz», — dep atap ótti Nurlan Atyǵaev.
Sondaı-aq, megapolıstiń iri saýda ortalyqtarynyń birinde TJD qoǵamdyq qabyldaýy jumys istedi, onda barlyq nıet bildirýshiler órt qaýipsizdigi salasynda ózderin qyzyqtyrǵan suraqtaryna jaýap ala aldy.
Osyǵan deıin ShQO-da pesh jaǵyp otyrǵan 11 myńnan astam úıde qaýipsizdik erejeleri saqtalmaǵany týraly jazǵan edik.