Almatyda túrikmen, al Ashhabadta qazaq saýda úıi qurylady
ASTANA. KAZINFORM — Qazaqstan Úkimeti men Túrikmenstan Úkimeti arasyndaǵy «Qazaqstan Respýblıkasy men Túrikmenstanda saýda úılerin qurý týraly» kelisimge qol qoıý týraly» Úkimettiń qaýlysy ázirlendi. Qujat Ashyq NQA portalynda ornalastyrylǵan.
Esterińizge sala ketsek, 2024 jyldyń 10 qazanynda Qazaqstan Prezıdenti Qasym-Jomart Toqaev Túrkimenstanǵa resmı saparmen baryp, el Prezıdenti Serdar Berdimuhamedovpen kelissózder júrgizgen edi. Kelissózder qorytyndysyna oraı BAQ ókilderi úshin birlesken brıfıng barysynda Memleket basshysy 2023 jyldyń qorytyndysy boıynsha ózara taýar aınalymy 28 paıyzǵa artyp, jarty mıllıard dollardan asqanyn aıtty.
— Bıyl da oń dınamıka baıqalady. Biz taýarlar nomenklatýrasyn keńeıtý jáne saýda-sattyqty odan ári órkendetý úshin qolaıly jaǵdaı jasaý múmkindikterin qarastyrý jóninde kelistik. Qazaqstannyń aýyl sharýashylyǵy ónimderin, eń aldymen, bıdaı jetkizý kólemin ulǵaıtýǵa bolady. Elimizge eksportty arttyrýǵa jáne bizdiń naryqta uzaq merzimge turaqtap qalýǵa túrikmen bıznesiniń de áleýeti jetedi. Ekijaqty taýar aınalymyn taıaý keleshekte bir mıllıard dollarǵa deıin jetkizýge bolady dep sanaımyz, — degen edi Qasym-Jomart Toqaev.
Osyǵa oraı ázirlengen Úkimet qaýlysy ózara saýda kólemin 1 mlrd AQSh dollaryna deıin ulǵaıtý jóninde sharalar qabyldaý, sondaı-aq taýar aınalymyn ulǵaıtý jóninde qazaq-túrikmen jumys tobynyń qyzmetin jandandyrý jáne taýarlar nomenklatýrasyn keńeıtý máselelerin kózdeıdi.
Kelisim maqsaty — Almaty men Ashhabadta saýda úılerin qurý arqyly Qazaqstan men Túrikmenstan arasyndaǵy saýda-ekonomıkalyq yntymaqtastyqty damytý. Bul ózara saýdany keńeıtýge, iskerlik baılanystardy jeńildetýge jáne eki eldiń naryqtarynda ulttyq ónimniń ilgerileýin qamtamasyz etýge múmkindik beredi. Kelisimdi iske asyrý qysqa merzimdi perspektıvada (bir jylǵa deıin) saýda úılerin tirkeýdi jáne iske qosýdy, kórmelerdi uıymdastyrýdy, logıstıka men konsaltıngtik qyzmetterdi damytýdy, sondaı-aq turaqty eksporttyq-ınvestıtsııalyq platformany qalyptastyrýdy kózdeıdi.
Aıta ketelik Qazaqstan men Túrikmenstan quqyq qorǵaýda yntymaqtastyqty nyǵaıtyp jatyr.